近排香港天氣又熱又焗，就算夜晚踢波都覺得難頂，更何況係熱辣辣嘅巴西呢！為免班球員脫水，今屆世界盃首創飲水環節，當球證認為需要嗰時，就算係鬥緊波期間，都會畀啲球員飲水，呢個有創意又有建設嘅「飲水時段」我就好buy嘞！
對於我呢啲一年四季都要練波嘅人，我真心明白喺酷熱天氣下踢波有幾咁辛苦，特別比賽果陣啲汗係咁流，㩒咗掣咁唔識停，對身體帶嚟極大負荷，有個隊友更試過中暑；而巴西嘅天氣閒閒哋都有30度，對班唔慣熱嘅歐洲球星嚟講，又點會頂得住呢！作為球迷都想睇到球員嘅最佳狀態！補吓水，落場再踢好波，何樂而不為呢？
另外，子樑噚日提過新出動畫《The Last Game》，我睇完後即時諗起身邊有啲球員可能為咗少少嘅犯錯而頹晒，又或者練波、比賽辛苦就Hea踢，完全應晒條片嘅情節呀！希望佢哋睇過條片後可以學到嘢，每次落場都當係「last game」咁出盡120%力去踢，咪畀機會自己後悔啊！
文：許家樂
識睇 一定睇蘋果嘅足動世盃：
http://worldcup2014.appledaily.com/