（搬運工人將一車車啤酒送入蘋果茶餐廳）
艇 仔 張：德叔，你入咁多啤酒做乜，你間茶記又冇得直播世界盃。
德 叔：世界盃喎，梗係要搞吓綽頭搵多啲生意。嗱，世界盃期間食早餐加5蚊就可以換啤酒，滿足到你哋班球迷啦！
街霸Ken：咁又係呀，今屆世界盃好多晨早6點場，食住早餐睇就一流；我公司都搞個新plan，二百幾蚊就可以用手機或者平板電腦睇足咁多場世盃，就算返緊工都有波睇。
艇 仔 張：星期日朝早仲有場9點場㖭，科特迪瓦對日本，撞正父親節，同老豆一邊睇波一邊隊啤，做吓孝順仔都好。
街霸Ken：咁呢場波你又有咩心水先？
艇 仔 張：我今屆睇好日本㗎，呢場波平手盤，梗係捧日本（圖）啦。
德 叔：唔係喎，科特迪瓦個耶耶托尼好鬼「弗」喎，曼城今季拎英超都係靠佢，加埋杜奧巴兩支大杉，日本仔點頂。
艇 仔 張：其實日本呢幾年進步咁多，同佢哋不斷輸出外流兵都有關，後防酒井高德、內田篤人等踢德甲，對慣晒啲神高神大嘅球員，香川真司又踢開曼聯，又點會怕曼城嘅耶耶。
德 叔：好，我就同你賭牙骹，邊隊輸就隊晒半打啤酒。
艇 仔 張：怕你呀！
識睇 一定睇蘋果嘅足動世盃：
http://worldcup2014.appledaily.com/