【朝聖之旅】
【本報訊】四年一度世界盃令全球瘋狂，四個80後港男球迷去年起節衣縮食儲到10萬元，組成25日巴西睇波團，他們當中有甲組腳，又有醫療放射師。睇波團昨凌晨出發，他們說「10萬蚊唔少錢，但可以完成現場睇世界盃夢想，絕對值得！」預計他們今日抵達巴西。
記者：陳達浩 林熊
睇波團成員包括港甲南區足球隊右後衞曾昭達（25歲），昨日中午他們到達中東卡塔爾首都多哈，之後轉機飛14小時去巴西聖保羅市，再轉機到目的地福塔萊薩（Fortaleza）。在多哈等待的兩小時中，他們難掩興奮，立刻自拍將照片上載facebook，其間更遇上一批波斯尼亞球迷，對方亦是轉搭同一航機去巴西，彼此大談波經，齊齊踏上世界盃之旅。
順道遊里約熱內盧
阿達說同行三友是多年舊同學及校隊隊友，去年大家重提一個兒時約定促成此行。其實現時本港有旅行社舉辦富貴睇波團，機票、酒店連決賽及半準決賽門票，費用高達30萬元，阿達說自己跟團友都是打工仔，惟有自己一腳踢上網訂球賽門票、機票及酒店。
越洋睇波最緊要訂到門票，去年八月他們趁國際足協第一輪將門票放上網開售時預訂套票，成功訂購五場在福塔萊薩（Fortaleza）舉行的賽事門票，包括四場分組賽及一場十六強賽事，門票售價每人五千多元，當中包括巴西對墨西哥的分組賽，令巴西球迷的阿達及阿浩喜出望外。
訂到球賽門票，再訂到機票及酒店房，難得巴西之行，他們會順道一遊里約熱內盧，看看耶穌像及到伊瓜蘇瀑布觀光，埋單計數已花費8萬元，另留兩萬多元作當地使費。
為實現夢想，阿達的代價是慳，慳，慳。阿達月入一萬多元，直言10萬旅費是個沉重負擔，因此去年起節衣縮食。「我最鍾意食日本菜、但過去一年改食茶餐廳，另外長短線旅行全部暫停；慳咗成年終於儲到啦！」仍然待業的阿達更帶同巴西球衣，希望見到偶像巴西右後衞丹尼爾給對方簽名。
孻仔還要過父母關
機票訂好，最後要過父母一關。原來四名港男睇波團成員都是家中孻仔，加上巴西出名治安差，令四人的父母憂心不已，阿達說由去年起他們一直游說父母，終成功打動父母讓他們成行。
阿達說，今年父親節人不在港，所以上周已提前與兩名兄長及父母吃飯慶祝，席上爸爸媽媽送贈護身錦囊，「阿爸話凡事忍讓；阿媽就叫我唔好多事去睇人爭執，以免有乜事殃及池魚。而且錢同證件要收埋啲。真係發生乜事，錢財身外物，保住條命先重要呀。」
識睇 一定睇蘋果嘅足動世盃：
http://worldcup2014.appledaily.com/