如果你舊年買咗好多乳業股，恭喜你，你應該好易就跑贏大市。奶類製品是現時內地少數仲有organic growth的消費品，去年新西蘭旱災，令原奶價格急漲，下游生產商雖產量受限，但多次加價，轉嫁到成本仲有餘，業績自然靚仔。可惜物極必反，內地對優質奶製品持續強大需求，近年已吸引大量國際品牌加入混戰，加上中央有意整頓乳業，不少公司的增長勢頭，今年已開始出現逆轉。
聞說上月底內地最大網上超市「一號店」，搞咗個進口奶速銷活動，一個鐘頭內賣清咗100隻貨櫃牛奶，共200萬盒。業內人士話，千祈唔好以為進口奶好貴，以前佢哋入中國，要靠實體超市同雜貨舖，營銷成本高，又好難同已滲透晒入去的本地品牌爭。但自從網購興起，進口奶以較低成本覆蓋全國。現時進口奶零售價，和蒙牛（2319）等本地牌子相差無幾。所以高端奶、液體奶，未來場仗都幾難打。
至於早幾年發過肥仔的奶粉商，今年亦都唔同講法。除短期存貨積壓問題外，奶粉商早年靠sell「原罐入口」、然後年年加價的板斧，在中央去年決心整頓後，已唔再適用。如果單計銷量，奶粉增長其實只有幾個巴仙。加上有外國奶粉係咁減價，今年奶粉商如果仲有增長，都算還得神落。
海迪
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp