許仕仁與新地案正式開審，傳媒可以正式報導審案詳情，於是各大報章連日以大篇幅刊登主控官開案陳詞，讀者想話睇唔到都好艱難，左丁山於是想起九位陪審員，六女三男曾受法官勸諭：不要看報、看新聞、勿與別人討論案情。以香港咁細小地方而資訊多到爆炸，電台、電視、互聯網、收費報、免費報等等無不詳述案情，你話要完全視而不見，聽完不聞咁只係唯一專心聽取庭上雙方大律師陳詞，何等不容易，多麼的辛苦？左丁山真係要向呢九位陪審員致敬。
我地在庭外，自可品評，中午飯局幾位老友無不講到口沫橫飛，提及年入百零萬，年花過千萬之指控，無不感慨。我地全部係打工仔，雖則收入比普通工人高，消費水平不同，但打工仔無論係會計師、律師、銀行家、行政總裁，年薪過千萬元者，並不多見。不少人有個迷思，以為成功投資銀行家可過奢華生活，但賓架W已經係一等一投資銀行家，佢話過俾左丁山聽，佢與華爾街啲同事比較過（皆屬拍拿級），大家年薪差不多，但年薪連花紅在內，如長期年復一年超過二百五十萬美元者，根本係極少數，如任職投行三十年，累積私人財富過億美元（不計個人炒股所得），直情係鳳毛麟角，坊間誇大投資銀行家嘅收入，只係外行人之言。
既然高收入嘅打工仔都難以做到所謂billionaire（十億元富豪），其他人就更難諗，是故大家千祈唔好養成expensive habits（昂貴嗜好），例如坐頭等飛機去維也納聽歌劇，否則好難持之以久。一位真正十億富豪就有意無意咁對左丁山講過：「FT嘅附送雜誌How to Spend It，係俾你幻想吓嘅啫。」言下之意，係左丁山買唔起雜誌推介嘅產品，例如一件看似普通嘅飾物都有標明售價──動輒二三千英鎊，四萬幾港元買隻手錶喎，根本未入流，三萬銀吃餐飯，又係未入真正富豪法眼，故此打工仔無謂充生晒。好耐以前財富雜誌（Fortune）已有長文講Flow與Stock嘅分別，真富豪有十億港紙現金（stock）一年穩定收益要有五千萬港元，並不困難，每年使晒，明年又有五千萬，正所謂火燒旗杆──長嘆！但最高級打工仔即使一年有三千萬元收入（flow），今年使清光，明年未必有，若因種種原因，俾董事會炒魷嘅話，怎麼辦？打工仔應該趁好景時，盡量積蓄，把flow逐漸轉化為stock，方為上策，亂咁花錢，必然後悔莫及。
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp