最近睇到單新聞，話多得傳媒不停宣傳「安倍經濟學」，加上日本股市有起色，越來越多日本女性落場炒，有證券行女性客戶比例創歷史新高。雖然係新高，但都只不過係24%。
喺香港，有買股票嘅女人，隨街都搵到幾個。不過大家都知日本係一個極度保守嘅國家，女性上班族嘅比例都少過人，更何況係女炒家？你叫佢哋分析鬆弛熊有幾可愛，一定易過叫佢哋估後市係牛定熊。所以為說服呢班潛在買家入市，各大公司都扭盡六壬！
日本上市公司於派股息外，亦好興向股東派「株主優待券」，即係股東專享嘅優惠券，優惠可以係免費獲贈化妝品、廁紙等。據統計，日本3,788間上市公司，有三成係會進行呢類「實物分派」。最正嘅係，張券仲可以轉售。至於券商搞研討會時，為吸引女性，宣傳海報一定會用粉紅色，更會以派蛋糕、曲奇作招徠。
冇錯，女人係好易氹，如果靠派着數嘢，能令佢哋跳入金魚缸，多啲人參與，市場氣氛當然好。
不過，股民都要講質素，因為貪小便宜，恨你一兩張coupon，而進行實際上應經過理性分析先扑鎚嘅投資活動，呢批股民最多只係做到小散戶；對大戶來講，呢批人進場當然多多益善，因為多咗一批羊牯等被劏。
Fifi
http://www.facebook.com/lovefrystock
本欄逢周二、四刊出
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp