祥 Hi：巴西（圖）讓球半/兩球？有冇咁癲呀！第1場喎，同你晒冷咩？
肥 頭：你唔好理，開得出呢個盤，證明莊家對巴西有信心，都係想𠱁賭仔買克羅地亞啫，我唔會咁蠢㗎。
街霸Ken：唉，讓球盤都係唔啱我玩，我頭先聽有個客講，佢話照賠率睇，如果分組賽買晒巴西3場W，都係得1.5至1.6倍；又唔係賺得多，博佢有場和，可能仲好賺。
肥 頭：哎，你唔好亂聽人講啦，如果要博和，3場你揀到邊場呀？克羅地亞本身最有機，但冇咗個射手，我點都唔信有機會和到囉！
艇仔張：嗱！肥頭，說話又唔係咁講喎，巴西真係唔使分組賽贏晒，打到咁搏做咩？我就同街霸Ken同路，但就單頭買晒3場和博一博，是旦和1場都贏到錢啦！
祥 Hi：艇仔張，咁如果我單買1場和，你覺得邊隊最有機會先？
艇仔張：咁梗係博喀麥隆最後嗰場啦，當巴西前兩場攞夠分，明冇？
肥 頭
算喇，既然買主W冇肉食，你哋又講到好似開唔到多過1球咁，我都係玩吓「特別項目」，買尼馬入1球都唔係好過份啩？有2.5倍，買50蚊都好！
祥 Hi：哈哈，邊件事會首先發生喺尼馬身上好玩啲喎，佢又插水又多口，我博一博紅牌，有成90倍！
街霸Ken：得啦，祥Hi，你不如飲埋你碗紅湯先啦，碟飯都攤到凍晒喇！
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp