各位球迷唔使擔心，葡萄牙球星基斯坦奴朗拿度（C朗）已經好番，仲喺周二嘅友賽踢正選㖭！雖然佢冇入波，但踢落幾順，成日搵到機會起腳，最後葡萄牙以5:1大炒愛爾蘭。外國傳媒估計C朗會喺下周一對德國嘅首場世盃分組賽正選上陣。
C朗係當今兩大球星之一，仲喺29歲嘅當打之齡，如果今屆世盃冇咗佢，真係失色不少㗎。近呢兩個星期，成日見到C朗受傷缺陣嘅消息，到禮拜二，終於可以安心，總算見到C朗健健康康咁喺正式比賽踢波。呢場對愛爾蘭，C朗近半個月嚟首次上陣仲踢正選。佢繼續得到球隊嘅無限開火權，全場6次起腳，4次中目標，唔少都係遠射嚟，最近磅嘅一球喺19分鐘出現，佢主射30碼罰球中柱。話晒傷癒第一場，教練保羅賓度喺66分鐘就收起C朗，等佢唞吓。雖然C朗冇波入，但葡萄牙有曉高艾美達梅開二度，維爾連亞同法比奧干查奧各入一球，加埋對手嘅基奧治擺烏龍，以5:1大勝愛爾蘭。喺美國踢完呢場波後，葡萄牙就會到巴西，備戰下周一對德國嘅分組賽。
比比梅利斯齊復出
保羅賓度見到C朗復出，賽後好高興咁話：「C朗踢得好，尤其佢已經兩個星期冇踢過正式比賽。好似C朗咁勁嘅球員，無論對邊隊嚟講都係咁重要，我哋亦唔例外。」除咗C朗外，葡萄牙仲有兩名傷兵喺呢場復出，分別係中堅比比同中場魯爾梅利斯，保羅賓度當然笑晒啦，「我哋所有球員都可以候命，冇傷病嘅煩惱，實在太好嘞！」
翼鋒拿尼亦喜見大師兄C朗回歸，「我認為佢今場踢得好好，同埋佢藉今場比賽同大家講，去到世盃，佢將會有百分百嘅狀態。我哋喺強手雲集嘅小組，但其實踢得世盃，就預咗場場難踢。我哋已經準備好，所有人充滿信心。」
對手拿姆未驚過
雖然葡萄牙士氣高昂，但德國都未驚過，隊長拿姆話：「有冇C朗都對我哋冇影響，C朗係勁，但我哋都係如常備戰。反而對C朗嚟講，今屆對番我哋，應該別有感受。」喺06年世盃季軍戰，葡萄牙就輸咗畀德國。
識睇 一定睇蘋果嘅足動世盃：
http://worldcup2014.appledaily.com/
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp