家樂撐葡萄牙，我就撐巴西喇！森巴兵除咗係今屆主辦國，有主場優勢外，就連個陣容都係粒粒巨星，尼馬、大衛雷斯、堤亞高施華、施薩索拉斯同韋利安等等，呢個陣容真係打機都未必買到，咁嘅優勢，都好難攞唔到世界盃啦！所以識撐嘅一定撐巴西！
Nike星期二就出咗一條新動畫《The Last Game》（圖），講8個球星原本喺球場未逢敵手，但之後俾班所謂完美嘅複製人取代，仲搶埋佢哋飯碗㖭；外星人朗拿度見到呢個情況，梗係要做啲嘢啦！佢搵班球星同複製人嚟一場「Last Game」嘅賭注，邊個贏就可以留喺球場，輸就冇得留低，結果係點？自己上網睇喇。條片搞笑之餘，仲令我有好大感觸，因為自己都試過類似經驗──為咗足球，連畢業禮都要早走。所有未睇嘅波友，快啲睇喇！睇咗仲唔夠喉？唔緊要，因為8位「球星」今日就會現身海港城，我就梗係會去同佢哋合照啦！
同往年一樣，今年世界盃都喺凌晨踢，考驗大家為咗睇世盃可以去到幾盡。家樂講咗啲小攻略畀大家知，而我亦有「提神3寶」，等自己睇睇吓唔會瞓着。想知？下次話你聽！文：陳子樑
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp