噚日係Beyond主音歌手黃家駒嘅52歲生忌，雖然到月底佢就離開咗我哋21年，不過好多佢嘅fans都仲未忘記佢。十幾位歌迷噚日就帶同偶像生前最鍾意嘅可樂、香煙同朱古力，去到將軍澳華人永遠墳場拜祭家駒。歌迷放下鮮花之後，一直圍住墓前彈結他合唱Beyond嘅歌曲。其中一位男歌迷Vincent話，歌迷會自發性喺呢個月30號，喺觀塘舉行一個較細規模嘅紀念活動。
講到自從家駒走咗之後，Beyond三子越走越遠仲成日傳出不和嘅新聞，班歌迷就話真係好唔想見到呢啲消息，特別係話佢哋不和，仲話好想佢哋能夠摒棄成見，一齊舉辦紀念家駒嘅音樂會。
Paul世榮齊悼念
喺呢個日子Beyond嘅成員黃貫中（Paul）同葉世榮都喺微博開腔，Paul回想當年同家駒嘅豪情壯語「我還記得我們四個人互相鼓勵說：『我們要以拿最多銀獎為目標，因這要比奪金的更難啊﹗』自從你走後，你的音樂從未停過，你比廿年前的你更真實，更堅韌的活着，生日快樂，萬壽無疆」，另一位成員世榮就簡單祝「生日快樂，開開心心」，反而細佬家強就冇表態。
撰文：馮仁昭
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp