【台北】睇戲果然係導演拍拖嘅最佳活動！繼彭順拖𡃁模Liddy啜住喺香港圓方商場睇戲，64歲嘅大導徐克，前晚背住老婆施南生，同年約30歲嘅「嫩版湯寶如」喺台北京站威秀拍拖睇電影又畀記者撞到正，徐克同染咗一頭銀色短髮嘅女友最初肩並肩行，行行下就手勾住手，「嫩版湯寶如」成日望住徐克冧笑，又伸手摸男友臉，旁若無人。
睇足兩場戲
前晚有人爆料，話徐克同一個女仔喺京站威秀睇電影《黑魔后：沉睡魔咒》，記者趕往現場，果然見到徐克同一個染咗一頭銀色短髮嘅女仔着住全黑情侶裝喺戲院，兩個人喺售賣位置行下又停下，一臉難捨難離，似乎唔想就咁散band，結果最後女方又走去買多張午夜場戲票睇《哥斯拉》，二人一晚睇足兩場戲。
本報收到風，呢位年約30歲嘅「嫩版湯寶如」名叫樂樂，係徐克網交識番嚟嘅，爆料者話徐克係喺11年拍《龍門飛甲》前喺網上識佢，越傾越啱key，徐克就叫樂樂做埋佢私人助理，而之前同陳佳佳傳嘅緋聞就只係流料。
其實08年已經傳過徐克同施南生已經分開，徐克都唔只一次畀人影到約女夜蒲，但兩人一直都唔肯公開講婚姻問題，施南生話徐克在公在私都係好伙伴，徐克又話施南生係佢阿媽以外最重要嘅女人，但𠵱家徐克公然攬女睇戲，關係越搞越複雜。
撰文：小米
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp