教育局局長吳得掂有幾唔掂？查實大家從佢上任以嚟嘅表現，已經心中有數。教協就問過一班老師，發現如果要為局長評分，過半數都會向吳得掂送上「零雞蛋」；嚟自幼稚園、小學、中學同大專嘅教師，各自有「肥佬」吳得掂嘅原因。
小學教師不滿壓力大
教協喺5月12日至6月5日向任教專上院校、中學、小學同幼兒教育嘅會員發出電郵，為吳克儉同教育局嘅施政同工作評分，最後收番2,798份問卷，當中94%教師覺得吳得掂工作表現唔及格，一半教師仲畀佢零分，當中以中學教師畀唔及格嘅比率最高。針對吳得掂領導嘅教育局，就有47%教師畀零分；而局長喺教育界嘅施政表現就有超過一半教師畀佢零分。
點解教師咁不滿局長嘅教育施政？原來幼稚園教師最唔like政府拖延15年免費教育，小學教師就最不滿工作壓力沉重，中學教師則嬲爆教育局拒絕小班教學，大專院校教師最反感學術自由倒退。
事實上吳得掂唔單止工作能力有限，中、英、數科都「肥佬」，例如用錯分道揚鑣呢個成語，拋書包引用名句時計錯詞語字數，英文水平亦一直被人笑，又難怪未獲教師歡心。教協就話吳得掂查實有十大罪狀，包括唔熟教育、唔聽民意、唔理教師死活同打壓佔中等。身為教育界議員嘅葉建源稍後會喺立法會提出辯論議案，要求吳得掂深切反省，如果唔係，唔排除踢佢出梁班子，要求佢問責下台。
李八方
mailto:[email protected]
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp