【世盃商機】
【本報訊】世界盃對球迷來說是四年一遇的大事；在商家眼中也是難得的搵銀良機。啤酒、零食是睇波良伴，有零食店更大手入貨20個貨櫃共3,000箱紫菜，而便利店則引入新款啤酒、杯麵，齊齊期望將生意推高兩成。可惜，今屆賽事均在本地凌晨3時後才開波，食肆及酒吧不太受惠。
記者：吳綺慧 石永樂 郭曉琳 鄭柏齡
阿信屋老闆林偉駿表示，已為世界盃引入德國、韓國及本地啤酒，亦增加了部份零食存貨：「入咗20個貨櫃的紫菜，總共3,000箱。我自己都好鍾意睇波，捱眼瞓、食紫菜係最好，對眼睛好呀！」薯片方面，林偉駿就指由於這季節原本就多薯片賣，故毋須特別加大貨量。
林偉駿預期，世界盃期間，單是零食類的銷售料會有10%至20%增長，但鑑於本港零售市道轉弱，其他耐用品銷情近日已受影響：「整體生意我唔敢太樂觀，持平就OK。」他又指，其他大型連鎖超市已「重鎚」力谷世界盃銷情，他為免最後「高開低收」，故會保持平常心，「唔同佢哋癲喇！」
酒吧「未開波已打定輸數」
OK便利店母公司利亞零售行政總裁楊立彬預計，今年賽事進行期間，銷售可有近雙位數的升幅；而分店在夜間的人流，亦應可增加約10%。「球迷可以在開波前嚟入貨，我們引進咗不少新啤酒、杯麵，相信有吸引力。」
不過，由於巴西與香港的時差關係，今屆世界盃64場賽事，大部份都是在香港時間凌晨3、4時開波，包括英格蘭對意大利、荷蘭對西班牙等重頭戲；而四強以後的所有賽事，更全數在3時後才進行，故不少餐廳、酒吧「未開波已打定輸數」。
「完場都天光啦，食肆肯定冇特別得益」。香港餐飲聯業協會會長黃家和表示，如果食肆打算做睇波客生意，意味他們有需要延長營業時間至通宵，「但現時人手、燈油火蠟等各樣成本都咁貴，我估只會有少部份茶餐廳肯咁做」。
蘭桂坊協會董事方亮璇亦預料，於世界盃期間，酒吧、餐廳的生意只會增長5%，遠低於上屆10%的增幅。「就算酒吧肯開到4、5點，啲客人都未會必留到咁夜，大家情願集中谷晚上12點嗰場」。
蘭桂坊的酒吧Graffiti負責人指，以往曾裝now TV及有線電視播球賽，但對生意幫助不大。「嚟呢到飲酒既人都以欣賞樂隊演出為主，就算擺喺到播都冇人在意」。他認為若球賽在晚上8、9時開波，影響才夠大，才會考慮裝設頻道。另一間酒吧負責人Biru直言，裝設TVB收費頻道使費大，至少每個月花一萬元，「仲要簽一年半約，開支太大」。
識睇 一定睇蘋果嘅足動世盃：
http://worldcup2014.appledaily.com/
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp