梁振英放風，削減兩成自由行遊客，商界紛紛反對。反對之聲未落，政府統計處宣佈四月份本港零售總銷值下跌9.8%，零售界立法會議員方剛仲話五月份數字仲要慘啲，懇請梁振英要小心啲。
四月份零售總值388.39億元，同比下滑9.8%，與去年相比，因2013年個個月上升，未跌過，今次一跌就係9.8%，比起2014年一月份下跌2.3%，二月份下跌1.3%，睇走勢就唔多妙，唔怪得啲零售股早已聞風下跌，跟住就係啲商場收租股無運行。
邊啲舖最受影響呢，因4月份奢侈品（珠寶、首飾及名貴禮物）銷貨值大跌39.9%，少咗42.2億元，扣除呢個因素，其實零售總值係有增長嘅，微升3.3%㖭，既然奢侈品係重災區，亦都只有奢侈品店可以承受得起月租二三百萬元嘅店舖，呢類店舖若非位於最旺嘅一線街（例如羅素街、廣東道），今年想加租就好難咯。Swatch都喺西洋菜街撻訂，改租一間較細小嘅舖啦。
一位代理界嘅商舖董事同左丁山講，佢注意到近年來港嘅內地客，以一日客為主，住五星酒店嘅豪客已逐漸減少，佢地隨時可以去倫敦巴黎米蘭，香港奢侈品銷售未必有競爭力，相反，珠三角一簽多行遊客因只逗留一日或大半日，故此傾向到新界西北，最遠去到尖沙嘴購物，以旺角為最旺中心點，呢類客買中下價貨、藥房貨、化粧品為主。如政府要收緊一簽多行，削減一日客嘅話，最受影響地區會係旺角。
豪客唔使政府削，早已自動唔嚟，政府干預市場之經常失誤，就係往往慢幾拍、慢於時機，一到正式拍板干預市場嘅時候，市場已經下跌，干預嘅政策變成雪上加霜，今次梁振英政府想買民望，露風聲話要削自由行，就係一個例子，到政府議論初定嘅時候，就會在即將倒下嘅駱駝上加一斤石頭！還有好多人講香港唔需要自由行，或自由行對香港經濟無大貢獻，佢地不妨想吓，勞動人民嘅主要職位係低增值工作，任何公共政策若會動搖或者謀殺呢啲職位，喺民主國家係政治大罪，香港從政者要三思呀！
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp