福 嬸：艇仔張，請問你洪都拉斯係咪喺非洲？阿爾及利亞又喺邊個洲？
艇仔張：福嬸，你臨老先嚟讀番書呀？定你個女請你去遊埠呀，不過冇理由去嗰啲地方咁冷門？
福 嬸：唔係，馬會搞咗個世界盃贏出洲份，不過有啲國家，我連佢哋係邊都唔知。
德 叔：你個盲毛乜都唔識就唔好搵嚟搞啦，嗱嗱聲落單好過啦。
艇仔張：咁你又唔好笑阿福嬸，年初過年嗰陣，佢就話自己整嗰底馬蹄糕好食，走咗去買馬體會拎西甲冠軍，又俾佢真係中咗；福嬸，凍奶茶少甜，唔該晒。
祥 Hi：咁勁？我又跟吓福嬸啲心水先？
福 嬸：唔好笑我啦，我鍾意十蚊廿蚊博吓冷啫，不過聽人講，巴西好鬼熱，世界盃期間仲要搞啲咩飲水暫停，咁鬼熱天氣梗係買非洲啦，有70倍喎。
德 叔：話你盲毛真係盲毛，世界盃咁多屆冠軍都淨係嚟自歐洲同南美洲，要爆冷？真係冇咩機會，我就捧梗巴西，要南美洲嘞。
艇仔張：得嗰1.82倍，我就唔買嘞，其實要博冷，亞洲都有機會㗎，日本上得好快，仲有100倍㖭。
祥Hi：唓，你捧日本，因為你BT返嚟啲「甜」片之嘛……
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp