仲有一日就開波，呢個禮拜喺Office只容許四件事發生：同事互Send世界盃Excel、搵免費Link睇波、同其他同事開盤（可以遠至歐美亞太區）、同埋度定病假（但你唔好同公司講噚晚拗柴囉）。如果你老闆係球迷就仲易話為，可以遲些少返工之餘，佢中波大家甚至可以萬歲，而做下屬可以唯一窒老細嘅機會，亦都係打牙骹波。
千萬個唔願意之下，我結果都申請幫襯收費事旦台，因為免費Link有機會炒、窒，仲可能慢幾秒，當你聽到窗外傳嚟街坊嘅X叫聲，你就預先知道有波入，為咗呢幾秒，同埋呢個欄，我豪一次咁多。無辦法，一世人只有10幾次睇世界盃機會，我當你6歲識睇波，再有六叔咁長命，你睇盡都係25屆。小弟86年剛好10歲，同各位小學雞一樣，當年有儲世界盃貼圖冊，亦見識過馬勒當拿式神蹟，自此成為世界盃狂迷。
今屆只要大家搵少少時間畫鬼腳，就會見到幾隊勁旅派得幾好籌，尤其G組德國，直入四強無難度；西班牙只要B組首名避開巴西，又係直入四強；巴西首名出線就一定，極大機會於16強（29日）撞正荷蘭，只要撼贏橙軍，又係直入四強。至於四強仍有一位，似乎係阿根廷，因為又係順路一條，但眾所X知，阿記出名高姿態炒粉，希望南美場幫到吓。至於意粉，so99y，應該八強被西班牙趕走。巴西正值內亂，如果世界盃輸埋，暴動就一定，所以，主場再加政治因素，我一注獨贏。
文：梁柏堅
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp