【壹週刊】上週深水埗榮昌邨發生單親媽媽殺B女案，案件本身已好悲慘，但最感人肺腑嘅係有老差骨寫下個人感想，本來佢只係WhatsApp俾朋友睇，結果被人廣泛流傳，爆哥最感動係佢寫，「個細路好乖，好平靜，好詳細咁答我哋嘅問題……我問佢你肚餓嗎，佢話叔叔其實我肚餓㗎，但係我食唔落，我聽完個心好痛……我當時真係拎（擰）歪面，啲眼淚忍唔住流咗出嚟！」
嘩！爆哥真係睇到標晒眼淚，問吓邊個寫，原來個老差骨係爆哥多年老友。佢名叫Kenny，而家個職位係警署警長，即俗稱「咩揸」，守過好多環頭，目前係CID探長，當日查案就係佢帶班伙記入現場。Kenny平日份人不苟言笑，睇唔出佢咁感性，即刻「發個輪」（打電話）俾佢問吓咩環境呀，佢即刻話呢個WhatsApp搞到佢好鬼煩，一來好多人想起佢底，傳媒猛挖佢出嚟做訪問，二來當大Sir知道呢單嘢之後，竟然話擔心佢有心理陰影，要安排佢見警隊心理醫生。
Kenny話估唔到會變成咁，其實自己有兩個仔，只係同情個細路，一時感觸寫了段嘢，點知搞出大頭佛。
iPhone App免費下載： http://bit.ly/nextplus_iphone
Android App免費下載： http://bit.ly/nextplus_android