冇咗列貝利打左翼點算好？法國教練迪甘斯似乎已經搵到方法，就係賓施馬。喺周日對牙買加嘅友賽入面，迪甘斯搵咗中鋒賓施馬去踢翼，結果效果唔錯，仲入咗兩球，助法國以8:0大炒牙買加。至於意大利就有意甲金靴恩莫比尼大演帽子戲法，贏富明尼斯5:3。
法國贈牙買加8蛋
列貝利因傷退隊後，唔少分析都估基沙文或者雷米會頂上踢正選，但喺對牙買加呢場波，迪甘斯就畀個驚喜大家，用基奧特踢中鋒，賓施馬就移去左邊。法國實力一嚟高好多，二嚟牙買加班波都冇出盡力踢，所以法國全場控制戰局，真係想要幾多球就幾多球！呢場踢左翼嘅賓施馬表現搶鏡，除咗梅開二度外，仲有兩次助攻。呢位皇家馬德里前鋒賽後好滿意新位置，「去巴西前可以大勝一場，感覺非常好！個個前鋒都有波入，大家都好高興，當然我哋都要多謝一班後防。我都有段長時間冇踢過左翼，呢個唔係我擅長嘅位置。我好努力同基奧特做配合，尤其喺下半場做得唔錯。」除咗賓施馬外，馬度迪同後備嘅基沙文都梅開二度，加埋卡比耶同基奧特各入一球，法國大炒牙買加8:0。迪甘斯賽後話，呢場比賽畀到佢哋信心，等球隊可以高昂士氣出戰下周日對洪都拉斯嘅世盃首戰。
意國金童勁過巴神
法國嘅賓施馬、基沙文要為頂替列貝利而努力，而意大利嘅恩莫比尼就要趁最後機會，希望可以搶走巴洛迪利嘅正選位。意軍周日同巴甲球會富明尼斯友賽，應屆意甲金靴獎得主、下季由拖連奴轉投德甲多蒙特嘅恩莫比尼入咗3球，仲兩度助攻畀恩斯治尼，助意大利以5:3擊敗對手。意大利教練柏蘭迪利話：「巴洛迪利？佢需要尋找入球，搵番腳風，就好似恩莫比尼同埋恩斯治尼咁樣。」
識睇 一定睇蘋果嘅足動世盃：
http://worldcup2014.appledaily.com/
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp