娛樂圈抗癌勇士司馬燕前年發現患上胃癌，受到癌魔重創，她即使把整個胃部割走，但身體內臟卻頻頻出現後遺症，繼今年2月發現其中一段尿管出現纖維增生致閉塞，需要做手術駁上人工尿管，每隔三個月便要入院更換膠管，近日又兩度腸炎，絞痛沒胃口，醫生昨日安排她到養和做磁力共振檢查，她昨午4時由老公吳忠義（Togi Gouw）做柴可夫送院。
「有嘢壓住膽管」
記者昨早致電司馬燕，問到她入院心情，她樂觀說：「我只係入去檢查一吓，不過要6個鐘前唔准食嘢，我𠵱家好肚餓，快啲照完搵嘢食。」體重跌到71磅、弱不禁風的司馬燕，昨午現身養和做磁力共振檢查，她下車看到有記者守候即說：「我冇事㗎！𠵱家冇乜唔食得，始終腸發炎，食物經過腸發炎嗰位會痛，之前我照過胃鏡，發現有兩個地方又紅又腫發炎，醫生建議我入院照吓睇吓乜事，乜嘢菌，亦有啲嘢壓住膽管。」
「老公不停搵工」
司馬燕表示腸炎病發接近一個月，她說：「我忍耐力好高，成個月，開頭見冇嘢，後嚟越來越痛，痛到攣住個身，忍唔到先睇醫生。」腸炎影響司馬燕胃口，她說：「西醫唔使戒口，但我盡量食清淡啲，食肉碎粥同魚湯。」司馬燕昨午做磁力共振檢查不用留院，日內有檢查結果。她表示老公及一對兒子不擔心：「胃癌咁大件事都擔心過，呢啲咁少嘢。」早前有指Togi停工陪老婆養病，她說：「佢早排見辛苦想休息吓，呢排都見咗幾份工，男人咁後生唔做嘢唔得，點養我同兩個仔。」本月15日父親節，司馬燕計劃一家四口到新界郊遊行大運。
採訪：張俊銘、比華利
攝影：陳俊強
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp