國家財政部擬收緊境外會計師在內地審計權限，事件引來極大迴響。會計界人士擔心飯碗不保，反應較激烈，自然可以預期；但有很多「唔太關事」的財金界人士，亦對事件表現相當關心。經歷了咁多年的金融業「中港融合」，他們有深切體會，最常提出的一句質疑是：點解總係要標準較高一方，去拉低個水準遷就你？而唔係調返轉？
有投行朋友說，幾年前大家都傾向聘請內地海歸專才，因為越來越多上市公司是內地企業，由內地人做分析員、賓架，自然較容易建立所謂的management asset，生意自然都多啲。但這條所謂「關係好啲」的界線，應當如何拿捏？上周五內地媒體就報道，內地中信證券醫藥分析師張明芳，在多個微信群中，發佈上市公司麗珠集團的一些資訊，並聲稱這些資訊是下星期先會公佈。如此明目張膽的發佈insider information，即引起群組中的基金經理紛紛「退Group」，免惹禍上身。
這樣的事情，當然絕非內地獨有，但如此高調地視compliance如無物，又真係內地人較為常見。海迪近年時有聽聞的「收錢寫報告」、「以基金的名義入股，但背地裏收番錢」之類的事件，無獨有偶，都是內地基金或從業員為多。聞說有外資投行某部門阿頭，已決定初級職位盡量減少請內地人，原因是驚自己「睇漏眼」。或許，這就是香港人咁抗拒被融合的其中一個原因。
海迪
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp