立法會財委會上周審議東北發展前期撥款，其間被反對東北發展嘅多個團體突襲，出現百人佔領立法會地下大堂嘅場面。一眾建制派議員噚日就聯署話要法律追究，仲講到明要調查係咪有議員助理係咪違反規定，私放示威者入場。
其實當日仲有段小插曲令新民黨葉劉淑儀好在意，話說開開吓會火警鐘誤嗚，與此同時人民力量陳偉業同社民連梁國雄先後要求休會疏散。葉太反問世事有冇咁巧合，質疑有人裏應外合放示威者入立法會。
黃浩銘叫葉劉道歉
睇番當日嘅片段，長毛梁國雄嘅助理黃浩銘、黃軒瑋等人都喺現場，唔通建制所指嘅就係佢哋﹖葉太就話當時開緊會，點會知邊個議助放人入嚟，只係睇到相關報道提出質疑，所以先要查個明白。八方問過阿銘，佢回覆六個字：「開名、對質、道歉！」既然建制唔敢指名道姓，佢認為現階段亦毋須要回應喎。
不過，八方翻查立法會文件「受立法會議員聘用的職員的行為守則」，其實並冇一項係關於帶公眾人士進入立法會嘅規矩，最多都係有「為不可令立法會及其服務的議員的信譽受損」同「盡其所能維護公眾利益」等空泛要求啫。
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp