阿里巴巴創辦人馬雲舊年推出嘅餘額寶搞到內地整個金融界呱呱嘈，最終要阿爺出聲先肯收斂一下，但馬雲一於好少理，今年3月又整個娛樂寶平台推保險理財產品，概念類似叫人夾錢拍戲，實行人人都可當電影大亨，結果又大受歡迎。
近年積極進軍文化產業嘅馬雲見機不可失，阿里巴巴噚日又宣佈，今日推出娛樂寶二期，今次可投資嘅電影一共5部，較上次多一部，包括劉亦菲與韓國紅星Rain主演嘅《露水紅顏》、荷李活巨星尼古拉斯基治有份演出嘅《絕命逃亡》等。
今朝9點起，網民可以透過手機淘寶去揀想投資邊部電影，同上次一樣，每人投資最少100元人民幣，產品預期年化收益率都係7厘，投資者有機會參加電影首映外，娛樂寶二期仲有唔少新賣點，除咗每人投資上限增加到2,000元人民幣，投資者仲有機會到海外探班、參觀電影製作幕後公司等，即係投資者有機去外國探阿Rain同尼古拉斯基治班，認真夠噱頭。
不過阿里冇講明，娛樂寶會唔會包埋去外國嘅機票同食宿使費㗎。
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp