6月3號，人在台北寫這篇稿。
明日飛回香港，參加一年一度的六四悼念活動。
往年義無反顧，風雨不改──維園。
今年有選擇，去支聯會主辦的維園燭光集會，還是毓民兄等在尖東文化中心的活動？
記得有一年，坐在我身旁的30歲大兒子，在風吹雨打的維園草地，自言自語：「頂，年年都咁嘅款，悶唔悶啲呀！咁唔creative嘅！廿幾年都係咁！一成不變！好心啦！」（我心諗，你想點改呢，悼念英魂喎！改嘉年華會？改party？仲要有女媾嗰隻？）
又記得有一次投票選立法會議員。一家四口四票討論如何配票，好讓泛民候選人可以當選。20幾歲的小兒子說，一定要投人民力量候選人。老婆只隨便說了一句：「唔好啩？佢夠晒票啦！怕民主黨、公民黨候選人唔夠票喎？」
他很不高興的說：「你哋投到夠啦！我唔投咁得啦啩！」掉頭就走，回家繼續瞓。
想起台灣，國民黨及民進黨的兩黨惡鬥，藍綠之爭，造成的家庭不和，甚至夫妻兄弟大打出手，時有所聞。真有點怕自己的屋企也會有同樣情況發生。
一家之主，當然要設法不讓類似事情發生。於是今日小心在WhatsApp問：「明晚六四，要一齊？否則我約劍虹叔叔一齊。」
兩個小孩也快手：「約埋一齊啦！」
心諗：「仔大仔世界，你哋都有靚女女朋友啦！點知你哋仲鍾唔鍾意同老竇老母一齊啫！」
再問：「明晚有選擇，支聯會維園燭光集會or毓民尖東晚會？」
一個回答說：「冇所謂啦！」一個說：「Victoria Park啦！」
如無意外，我們一家四口，明日會在維園。
想說的是，明晚去維園或去尖東，對我們一家來說，沒有甚麼分別的。各有各做，真的不必互相否定，互相詆毀，互相攻訐。
明晚在維園，舉起燭光那一刻，遙望尖東同路人，殊途同歸，為我們心目中的民主自由，一起奮鬥。
成功不必在我。
後記：
6月5日，人在香港寫後記。
集會真係25年如一日，悶到抽筋。又是那些老環節，又是那些老掉牙的演說（大陸維權律師滕彪除外），又是那些毫無技巧的司儀主持。
平反六四，結束一黨專政，叫足25年，遙不可及。我猜未來還有25年可叫。爭取真普選、佔領中環，已迫在眉睫，最後一里，反而輕輕帶過。應該把握難得面對面，對着18萬人的機會，多說真普選，多講佔中。
有人說，主題不同嘛！唉！我都明嘅，但我真係驚如果沒有真普選，維園的燭光會不會一年比一年暗淡？一年比一年失色？
既然悶到抽筋，以後還會去？
會啦！人哋在天安門拋頭顱灑熱血，我喺維園抽吓筋啫！
悶？咁真係唔係嘉年華會喎！好多嘢，啱就要做㗎啦！悶都冇法！
當晚真係好熱！向支聯會義工們說聲：「辛苦晒！」
逢周一刊出
葉一堅
mailto:[email protected]
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp