霍啟剛與郭晶晶二人專心照顧九個月兒子霍中曦，大部份時間都是晶晶主內貼身照顧囝囝，做全職母親。晶晶日前自生下霍小B後，首次抽空返內地，現身北京的手機品牌活動，她一身紅色單膊連身裙，身形已明顯修身，行紅地毯時吸引不少粉絲駐足吶喊。晶晶在台上不時微笑與粉絲揮手，簡短地與主持交談，逗留十分鐘完成活動，便由貼身保鑣護送離開，相信她火速返港湊囝囝。
望父親節有驚喜
啟剛昨日則與顏卓靈出席港台活動，記者笑他星期日應該家庭樂，他表示：「社會責任都緊要同值得，雖然家人都緊要。」啟剛透露中曦已有九個月大，已關注他的教育問題：「睇報導見家長搵學校激烈，人人都好奔波，自己未為個仔搵學校，會睇返佢性格，唔一定名校，最緊要啱佢。」
問啟剛會否想兒子入他讀過的母校，他表示：「希望，唔會逼佢，雖然會緊張，但唔係怪獸家長。」對於日前有雜誌拍到晶晶穿三點式泳衣與兒子在家游水，他表示：「當日天氣好，陪佢郁動吓，無咁快敢跳水，適應吓水，佢有運動天份。」提到父親節，屆時他會由內地趕回來，晚上與家人慶祝：「希望晶晶有驚喜，之前佢第一個母親節都有俾驚喜佢。」
採訪、攝影：王連連
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp