【本報訊】受觀塘重建影響，屹立30年的物華街及協和街小販檔，上月中遷往同仁街前政府合署的臨時小販市場。不過，有商販批評新市場宣傳不足，平日「靜過鬼」，人流大跌一半。有商販曾經一日只做到10多元生意，甚至全日不發市。曾要求市區重建局「無縫交接」的內衣檔檔主李淑賢也批評新市場通風不足，空氣不流通。
觀塘前政府合署的同仁街臨時小販市場上月16日正式落成啟用，較預期延遲兩個月，昨早舉行開幕儀式，多名建制派立法會議員包括陳鑑林、黃國健及謝偉俊都有出席。市建局觀塘項目總監李樹榮都有現身，但拒絕接受傳媒訪問。有商販批評出席的議員在市場搬遷時從來沒有提供援手，昨日只是來做騷。
檔主抱怨「靜過鬼」
面對近10萬元賠償不為所動、一直堅持要求市建局遵守「無縫交接」承諾的李淑賢坦言，「講真你問我有冇幫過我？我話畀你聽冇一個幫過我！（出席開幕的立法會議員）都冇喎，冇見過，完全冇見過，唔會行埋嚟問你一句。由我喺物華街，冇一個嚟幫過我。今日啲議員、李樹榮都冇行埋嚟。」
她指遷往新市場已經三周，但生意及人流大不如前，最差試過一日僅做到兩百多元生意，「雖然話呢度近車站，但啲人上車落車，都冇人嚟行嘅」。她稱，人流不足，「有啲做幾十蚊一日，有啲甚至唔發市，朝早開檔戇居居坐喺度，惟有睇吓報紙打發時間，呢度冇人行，大家咪行出來傾吓」。
李淑賢批評，新市場的風扇不足，空氣不流通，「風扇喺檔口頂，唔喺行人路，應該喺行人路，顧客行埋嚟都舒服啲啦」。她最後自費安裝風扇，「畀啲客人買嘢都涼啲」。她建議當局應在場內加裝多把風扇。記者昨日現場所見，市場通道較窄，而每個檔位只有約24呎，另有逾半的檔位仍未開業。
售賣頭飾的黃婆婆也抱怨市場「靜過鬼」。她指市場雖然近港鐵站，但生意和往日「冇得比」，「啲人經過都趕住走，點會停低？」她抱怨曾經一日內只做到10多元生意，「租都蝕埋」。
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp