呢排睇新聞，真係幾灰，日日都係講球星因傷緣盡世盃，例如拿斯賓達、蒙杜利禾、列貝利同馬高列奧斯。好在，我求大俠終於收到啲喜訊，基斯坦奴朗拿度（C朗）同埋蘇亞雷斯終於復操。至於美斯雖然喺上周六對斯洛文尼亞比賽中又嘔，但最後都入到波，幫阿根廷贏2:0。
C朗阿蘇已復操
C朗喺上個月踢歐聯決賽前，已經覺得左膝同埋右大腿唔舒服，但佢頂埋場決賽先至休息。結果一唞就大半個月，令人擔心C朗踢唔到世盃。葡國足總上周六出聲明，大派定心丸，話首席球星C朗已經好番，可以參加球隊訓練。喺開放畀傳媒拍攝嘅15分鐘操練入面，C朗行得走得，踢波都冇問題，唔覺佢身上有傷。不過，中堅比比右腿肌肉仲未好番，都仲係一個人操練。葡萄牙周二會同愛爾蘭踢多場友賽，之後先飛去巴西，下周一就會出戰首場世盃分組賽，大戰德國。
而烏拉圭嘅蘇亞雷斯亦喺上周六復操，佢哋足總話：「阿蘇行得，跑到直線，同埋第一次踢過世盃專用波Brazuca。」有烏拉圭報章仲話，阿蘇已經參加過短傳訓練，同埋練頭槌，睇嚟進度幾好。但烏拉圭近日閉門操練，所以記者要偷拍先影到阿蘇跑步。烏拉圭星期六會踢D組首場比賽，對哥斯達黎加，未知阿蘇出得未。
美斯上季狀態麻麻，仲俾人寸佢留力世盃。無論點都好，呢位阿根廷前鋒喺上周六後備上陣對斯洛文尼亞，佢同列卡度艾華利斯各入1球，幫球隊贏2:0。雖然美斯喺呢場比賽又嘔，但相信唔會影響踢世盃嘅。美斯賽後話球隊非常團結，「我哋前所未有咁團結，因為大家有同一個夢想。」
識睇 一定睇蘋果嘅足動世盃：
http://worldcup2014.appledaily.com/
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp