創業朋友，一向搞開自家手機產品，忽然說想撈埋接外包，身邊人告誡，接外包如吸毒。
外包毒不毒，視乎正職是甚麼。如果正職是接外包，外包是好事。如果正職是開發自家產品，任何課外活動，都可能有害，因為做產品，要搵到食比外包難得多，需要好專注，先有些少機會成功。
做產品難，要專注，行內個個都知。道理上，所有課外活動都要小心，但只有接外包會去到毒的境界，因接外包不只搶了做產品的時間，之所以毒，是吸之前，永遠低估自己上癮的程度。
明明想做產品，但走去接外包，通常的想法是：產品要燒錢，但無錢燒，不如先接外包搵錢，同時叫一兩個同事，先行做產品，到產品上了軌道，搵得越多，就轉移更多同事幫手做產品，終有一日，產品夠養成隊人，就金盤洗手，同外包講拜拜。
以上的事情，發生過，但屬好少數。問題是，通常這樣心態做產品，會偏向放太少人做，總會去到好多位，掙扎要不要借調外包的同事幫手，而因為外包是受人錢財，又有硬死線，結果總是揀外包，於是產品根本不會見到所謂上軌道的一日。
另一問題是，道理上，接外包賺的錢，夠養產品隊就停，但實際上，有嚿外包錢放在面前，好難拒絕，就同自己講，接下這單，可以儲更多的錢做產品，結果不停地接「最後一單」。
要戒毒 除非個市差
戒毒有兩大障礙。第一，是好市。想創業的人的最大敵人，是好市，因為打工好搵。想創業做產品的人的最大敵人，也是好市，因為接外包好搵，而這刻個市，是好好市，外包越來越貴，也越來越多，點停？
第二，是越接越叻。有位想做產品但又接外包的朋友，公司太強，接外包都接到掃獎，前排攞完大獎之後，睇怕更多人搵，價也更高。勁人遇上好好市，要金盆洗手，談何容易？當中之難，做之前好難知清楚，清楚之後又好難甩，於是毒。
未吸過的人，去勸人戒毒，好無說服力。但吸過的人，又好少見成功戒得到，勸人戒更加無說服力。外人勸不來，自己又上了癮，最大戒毒希望，是個市變得好差。對，個市變差，可以是好多創業人的轉機。
宋漢生
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp