歐錦棠前日接受咗Yahoo嘅周末訪談，佢話因為對無綫失望，所以暫時唔打算返TVB拍劇，歐錦棠喺訪問中講：「我同TVB係仲有合約，但短期唔會返去拍啦！自己算係幸運，可以有得選擇，你問我係咪對𠵱家電視感到失望，我答你，絕對係，TVB對我嚟講係越嚟越陌生。」
只識食睇瞓
歐錦棠回憶幾年前同佘詩曼合作拍劇，佢話：「其中一場戲係講我俾箭插時，要做一個痛苦表情，拍完後第二日，導演又話要重拍，話我中箭表情唔夠痛，我就話乜唔痛呀！重拍完到最後又揀番第一個中箭表情，點解韓劇好睇，因為人哋唔會再畀埋呢啲咁嘅嘢人睇囉！」
歐錦棠又批評時下部份新嘅電視藝員冇演員道德，純粹為搵食，佢話：「𠵱家最大網絡電視嗰班演員揭開呢度（腦袋）係冇嘢㗎！只係hea住做，只係識食、睇、瞓，甚至冇乜演員道德，真係唔好期望佢哋會為政治發聲。」馮仁昭噚日打畀佢，問佢咁樣批評無綫，怕唔怕開罪無綫？佢話：「我愛呢個地方先會有意見，至於批評新一輩演員，係因為我真係遇過某啲新藝員真係好hea，所以先會有感而發。」
撰文：馮仁昭
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp