踏入六月，體育迷睇波忙個不了，網球有法國公開賽決賽，NBA籃球有冠軍決賽，由東岸冠軍邁阿密熱火對西岸聖東尼奧馬刺，冰上曲棍球NHL史丹利盃決賽由紐約流浪對洛杉磯帝皇，打完之後，又有世界盃足球賽分組賽，簡直係目不暇給，可惜嘅係，美洲舉行嘅球賽多數係在香港早上舉行，香港球迷未必有時間睇。
幾年前與李怡同枱食飯，講起睇波，佢話鍾意睇NHL，主要原因係佢在加拿大居住時期，加拿大人最鍾情於冰上曲棍球，視之為國技，每有球賽，人人講波，人人睇電視直播，李怡難免不受影響，故此喜歡咗。可惜吖，今季NHL東岸決賽，滿地可加拿大人隊輸咗俾紐約流浪，與決賽無緣，否則加拿大對決賽賽事會更加狂熱。
紐約隊自1994年以來第一次打入決賽，紐約曲棍球迷為之哄動，況且近年紐約在NBA、NFL、MLB三大體育（美式足球、籃球、棒球）方面，都係入唔到決賽，今次流浪隊有望一吐烏氣，紐約人唔捧場就係假嘅，NHL決賽打七場四勝，第一二場在LA舉行，第三場於六月九日（紐約時間）晚上七時開戰，據CNN報導，紐約球迷拚命搶飛，麥迪臣花園內最佳座位嘅二手轉售票價係8,600美元（近67,000港元），簡值瘋狂，比原價2,490美元貴3.45倍，平均球票轉售價係2,363美元，用咁多錢嚟睇一場波？唔怪得好多人唔順，因球飛價格已充份凸顯咗貧富懸殊也，我哋平時睇美國球賽，偶會見到一家四口大細坐在場邊，覺得美國家庭幾可愛有溫情，但諗深一層，佢地可能已經用咗幾千美元一晚，中產家庭那能負擔得起。
不過在LA，球飛就比較便宜，在Staples Centre嘅平均價「只係」979美元啫，係左丁山一定俾唔起嘅價錢。如果紐約球迷買張NY-LA來回機票（五百美元），住一晚酒店（一百五十美元），加埋球票入場，嘩，仍然比起在紐約入場慳番近七百美元，夠食三餐勁嘅。啲球票炒到咁貴，但又場場滿座，氣氛熱烈，幾令人疑惑，美國失業率下跌得好慢，但又有咁多富翁去睇波（好多時一家大細齊出動），呢個現像值得 Think Like a Freak 嘅作者研究，入場球迷皆是1%？
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp