【記者黃雅盈報道】長實旗下荃灣新盤環宇海灣正在開售，發展商以交通便利及海景作招徠，但環保觸覺總幹事譚凱邦發現，樓盤廣告有多個涉嫌失實的地方，包括單是由屋苑行至港鐵站已需近10分鐘，單位的海景將會被新建築物遮蔽，質疑是誤導買家。
環宇海灣在宣傳小冊子以交通方便等形容物業，在報章廣告更用一男子走出港鐵站，以表示一出地鐵站就能到達。不過，譚凱邦昨帶同記者實地測試，發現步出荃灣西站，要走一段路穿過公園才可到達屋苑，而且環宇海灣和公園相隔一條馬路，不可以直接走過，行人需向前行大概50米才有斑馬線，全程最少9分鐘。
譚凱邦說：「發展商一直用鄰近荃灣西站作賣點，令買樓嘅人以為環宇海灣喺地鐵上蓋或者只行1至2分鐘就到，冇嚟過嘅人一定唔知係咁唔方便，而且唔可以直接過馬路，雖然佢（發展商）好似想起天橋，但又要入紙申請都有排搞。」
未提附近將建50層高新物業
另外，環宇海灣稱擁有海景優勢，但早前已被指大部份座數遭海灣花園遮蓋，近公園方向的兩座日後同樣會被新物業遮擋。「買樓嘅人以為買近公園方向嘅座數就睇到海景，但發展商冇講到，呢個方向將會起兩座50層樓高嘅樓，賣樓說明書又只係標示為CDA（綜合發展區），冇睇開圖則嘅人根本唔會知係咩」。譚指住客搬入去時，正值新物業建築期，將會受到噪音和空氣污染。
環宇海灣的背後就是荃灣路接駁德士古道，譚表示中低層的住客會飽受噪音滋擾。而物業的南方又面向荃灣靈灰閣與華人永遠墳場，雖然售樓說明書有分區計劃大綱圖標示，但大綱圖卻分成兩區顯示，如果買樓人士未有留意就隨時忽略了這點。譚認為政府的一手住宅物業銷售條例需要監管更嚴厲，以免發展商利用灰色地帶誤導買家。
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp