港股近月成為票房毒藥，冇人炒、冇人講兼冇人睇。另一邊廂，超人荃灣新盤就算幾多缺點，準買家一樣咁包容，誰說樓市唔掂。一、兩個月前仍然唱衰樓市的業界及專家，周內齊齊轉軚，代理出嚟話寒冬變小陽春，轉勢在望。花旗年頭仍估樓價跌一成，立即反口見底跌唔落。去年底估今年樓市跌兩至三成的摩通，直言樓價不會大跌，大幅調高地產股目標價。
今日的我打倒昨日的我，原本沒有甚麼大礙，但軚已轉，理據卻欠奉，借用港視員工金句:「我哋輸得起，如果有道理。」半年前口口聲聲話未來供應會大增、息口會逐漸趨升，政府辣招礙入市，但半年後這些缺點卻不是缺點，說甚麼剛性需求多過供應、美國有序加息、香港仍是負利率、延長DSD豁免期變相局部撤辣等等。
未來供應量、美息走勢甚至建築成本高，這些都是既知的事實，何解同一樣事情，半年內專家卻有如此大差異的解讀，股榮想了又想，能自圓其說的，可能只有一種，以上原因與樓價，其實不存在因果關係，極其量只是用來凶人拋你的藉口，說白點，就是因果謬誤，未有充分證據下，便輕率斷定因果關係的不當推論。
同一個事實 不同的演繹
代理想做生意，會同賣家講美國即將加息，樓價會跌，減價走貨要緊；對住買家就用另一套口吻，美國明年中加息，低息上車最後機會。分析員都是一樣。
近年報告似乎有點本末倒置，先有立場然後推論原因，而非有原因，然後推斷出結果。他們認為地產股唔掂，有了立場，然後判斷樓市亦會PK，點解地產會PK，就羅列出上述已知的事實。到了地產股轉勢，要轉軚，唯有講樓市唔會PK，同樣也是列出根本上沒有改變的事實，只是演繹方法不同。
事實擺在眼前，港樓好貴，但在長年超低息環境下，兩極化現象越來越嚴重。一係買家叠水有實力，買完一間又一間；一係連一間首期都畀唔起，或者過唔到壓力測試。目前六成業主已「供斷」物業，中小型樓劈來劈去，高開市價走，頂盡「減條毛」益下你。從賣家角度，根本上沒有誘因要豪畀你。新盤市價開，「關我乜事」；新地皮平賣，「發展商會益你咩」；明年加息，「真係加先算啦」。
過去幾次樓市大調整，原因一定唔係「阿媽係女人」的事實。雖然唔知幾時爆，但當大淡友也投降轉軚時，可能是一個較好訊號或啟示，樓市真的「熊出沒注意」。
投資銀行巴克萊三年前開始唱淡本港樓市，三年間起碼發表六份以上報告，估樓價喪跌最多45%，結果中原指數期內反而上升兩成。去年8月由大好友變為大淡友的陸東，估未來兩年樓價跌一半，今年就估樓價跌10%至15%。當兩個城中超級大淡友也棄械投降之時，樓市大跌應該不遠矣!
股榮
http://www.facebook.com/stockwing1
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp