世界足球最高水準嘅所在地，無可否認係歐洲，南美雖然盛產球星，但最好波嘅巴西、阿根廷球員，都受金錢吸引，湧晒去西班牙、英格蘭、意大利搵食，例如美斯、尼馬、蘇亞雷斯等等，故此歐洲係足球巨星雲集之地，而倫敦係世界金融中心，亦係賭波中心，不少足球博彩公司都在倫敦落腳，再因稅務理由，將營運部門設於Channel Islands，提供不少工作職位，主要係電腦系統IT方面。昨日所講之「三和」就有自己嘅全方位電腦系統分析全球足球賽事，將所有球會球員嘅資料、歷史表現、教練戰術等等做徹底分析，研判每場球賽嘅雙方取勝機率。
但有咁大嘅投資，當然要有同樣咁大嘅市場支持先至得，而大市場就係亞洲，富起來嘅亞洲。亞洲人富起來，點解鍾意賭波，將賭注源源不絕流入倫敦？呢個真係值得寫博士論文嘅研究題目，無論歐洲歐盟點樣巴閉，一計到投資、投注，相配合嘅法律、人才匯聚、施政靈活性，到最後總係倫敦贏晒，壓倒巴黎、法蘭克福、羅馬與馬德里，唔通講英文嘅地方硬係醒目啲？
亞洲人賭波成性，落注瘋狂，點解新加坡、香港唔可以成為賭波中心？左丁山唔係賭徒，香港做不了賭波中心，唔覺得可惜，只係奇怪亞洲人點解會咁相信倫敦賭博經紀，唔怕佢地走佬咩？或者呢啲就係亞洲人傾向相信英國人嘅聲譽、信用啩？昨日講嘅Frank Chan，在倫敦創辦三和，將傳統博彩名店Ladbroke、William Hill比下去，就係勝在識得喺倫敦開辦，服務番亞洲賭客，唔返嚟亞洲經營。
猛咁講賭波，似有美化賭波之嫌，要講番幾句平衡吓。馬會贊助大部份經費嘅「平和基金」（2003年成立，專責資助預防及緩減與賭博有關問題嘅NGO），會在世界盃期間舉辦一連串活動，宣揚反賭波，包括6月7日至22日，逢星期六日在銅鑼灣怡東廣場舉行周末嘉年華反賭波，7月6日星期日在修頓球場有明星青少年足球比賽，歡迎所有青少年參加，父母不妨帶埋細路去趁熱鬧，社會現實係亞洲賭波成風，但父母仍需要向兒女灌輸體育精神意識！
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp