82年意大利足球隊事隔差不多半個世紀後，第三度奪得世界盃冠軍，同年麥當雄導演的電影《靚妹仔》上映，女主角林碧琪成為香港金像影后。2014世界盃即將開鑼，主辦國巴西大熱，同期《靚》片延續篇的《微交少女》亦將上映。波係圓嘅，當年𡃁妹仔溫碧霞化身今日美魔女，開拍《微》片自己充任投資者。她以長輩身份探討兩代少女：「每一代嘅𡃁妹都反叛、都一樣恨得到自由。」
撰文：藍文浩
當年導演麥當雄起用一班全新面孔拍攝《靚妹仔》，據指當時他到各大夜場找演員，開宗明義是要將「蒲」帶上銀幕。82年電影上畫，主角林碧琪戀愛大過天，缺席所有宣傳，但無心插柳成為當屆金像獎影后，不過依然退出與男友杜麗莎弟弟弗烈（Fred Carpio）結婚，貫徹十幾歲天跌下來當被冚、想做就做的個性。
而另外一個女演員，溫碧霞（Irene）現時以美魔女身份繼續現身幕前，她將《靚妹仔》轉化成新片《微交少女》，與當年的男主角麥德和再參與演出當中主角的父母輩。
真人真事改編
由當年的𡃁妹仔看今日的𡃁妹仔，Irene不徐不疾地說：「其實開始唔係我嘅主意，係監製好鍾意部戲，所以今次係《靚妹仔》呢個題目嘅延續。今次Kabby（許雅婷）扮演我個女，佢十幾歲好反叛，仲會講吓𠵱家嘅女仔係點蒲、點墮落。香港好耐都冇過一部咁大膽嘅女仔電影。」
Irene亦認為「援交」現象值得探討：「真係好奇怪，唔知點解會有咁嘅現象，以前最多都係愛情大過天。新戲入面有個啞妹（蔚雨芯飾）係因為屋企好窮，所以要咁樣賺錢，呢個係真嘅case，其實幾悲劇，幾值得同情。Kabby嘅角色就好缺乏父愛，其實3個女仔（另一為李靜儀Heidi）嘅故事都好真實，喺低下階層其實有好多悲慘嘅故事。」
網絡令人大膽
當年乳臭未乾就被睇中拍戲，今日就以長輩身份再探相同議題，Irene對兩代少女的看法是：「年代係唔同咗，不過反叛嘅心態我諗都係一樣，一樣都係要自由、不顧一切，亦都一樣唔鍾意屋企。只不過世界唔同咗，以前女仔好單純，𠵱家互聯網好多訊息。所以我哋故事都係講用微信溝通，因為網絡所以啲人大膽好多，亦都開放咗好多。」
無意打入內地
猶記得在彭浩翔導演的《出埃及記中》，溫碧霞跟任達華有一句對白「你×我啦」，引爆不少網友巴打，今趟她首次成立電影工作室的第一部電影，就以粗口多掛帥，兩位美少女粗口直落到尾，流暢如行雲流水，亦擺明無視內地市場，她說：「呢個係社會問題，好真實，壞唔壞係睇自己，但係𠵱家一上網，任何嘢都可以睇到。其實《微交少女》係一部好local嘅港產片，入面好多暴力，亦都好大膽披露社會上好真實嘅情況。雖然內地上映唔到，不過我哋都入到好多影展，所以都一樣開心。」
Irene又盛讚編劇令電影更為紮實，她說：「我好欣賞我哋嘅編劇，佢做咗好多資料搜集，將好多低下階層、用錢去交易等好多嘅問題，好寫實咁表達出嚟。至於三位女演員Kabby、Heidi同蔚雨芯都做得好好，好自然。好似我以前咁，當年根本都唔知乜嘢叫演戲，但係佢哋三個就演繹得好自然。」
場地：安達CEO
髮型：Ken Ng＠AL CHEMY AL-KE-MEE
化妝：Katherine Tsang
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp