「細個睇電視，點諗到有日可以坐喺直播室講世盃！」人生，就像陳恩能（丹尼爾）的足球評述世界般充滿驚喜；今屆世盃，首次由電台跳入公仔箱；另邊廂，資深評述員曾偉忠（積sir），90年開始當世盃嘉賓，在公仔箱評了3屆世盃，今屆卻樂得清閒當觀眾。
記者：徐嘉華 攝影：黃賢創
陳恩能：世盃處子戰
丹尼爾集評述員、電台主持、專欄作家、體育公關及司儀於一身，今年最開心莫過於看了廿多年世盃，終於可以首次在幕前為觀眾評述。今周，他跟隨攝製隊到巴西探路，一時擁巴西女郎、一時與耶穌像合照，驚喜連連。丹尼爾幾歲開始已跟父親從粉嶺乘車到加路連山看南精大戰，亦跟父親齊捧英格蘭：「老竇係我頭號擁躉，我所有評述嘅比賽，無論F1還是U17女子世少盃，佢都喺電視機旁撐到尾。」
年少時的丹尼爾最難忘86年馬勒當拿上帝之手，以及90年加斯居尼哭成淚人：「馬勒當拿手球令我反思，足球明明用腳踢，點解可以用手，最後仲要贏波；世上點解咁唔公平？所以無論𠵱家美斯有幾勁，我都唔鍾意阿根廷。」加斯居尼令丹尼爾流下世盃第一滴淚：「佢喺我心中係鬼才，鬼才一定早死，好似F1冼拿，後者係生命上的早死，前者係職業生涯嘅早死。加斯居尼嗰種智慧同創造力無人能及，90年世盃4強領咗黃牌後，知道就算英格蘭入決賽自己都要停賽，佢即場流下男兒淚，我喺電視旁都跟住喊。」
避講英軍怕太主觀
丹尼爾首次參與世盃工作在02年：「我入電台係做PA，01年竟然有機會開咪做體育節目，02世盃期間撞正蘇施黃節目時段，於是喺佢節目內借幾分鐘講波。」之後兩屆轉去港台講波，今屆跳入電視，為上鏡更積極減了十多磅：「講波要客觀，但我對英格蘭客觀唔到，最驚佢哋射失12碼令我失控，所以我寧願唔評英軍。」對於今屆英格蘭的機會，丹尼爾認為能出線分組賽已很好了；而冠軍，當然是巴西。
曾偉忠：停mic做球迷
當丹尼爾陪加斯居尼痛哭的時候，積sir已在銀幕擔任世盃嘉賓，做過3屆世盃評述員的他，認為評世盃的過癮程度，媲美在now評港甲。今屆無緣評述世盃，積sir坦言「口痕」：「做足球評述除咗係職業外，最大樂趣係能夠同球迷分享，自己係球員出身，又做過教練，可以同球迷分享比賽中嘅技、戰術，畀球迷多一個角度去參與。」
3朝元老轉講港甲
94年掛靴出任甲組隊教練的積sir，08年正式投入評述員行業，但其實評述經驗早於96年開始：「當年有線高層賴汝正叫我講波，我第一個反應係『我得唔得㗎』；以前覺得講波佬係神仙，可以一邊交代球員背景，另一邊講比賽發展。」90年開始以嘉賓身份上電視評世盃，98年開始連續3屆參與世盃評述工作，近年則專注評港甲，積sir認為兩者同樣過癮。「外國波我抱欣賞球賽嘅心態，一邊講一邊挑剔球員，反正佢哋聽唔到；但港甲，我有使命感同責任感，好想觀眾聽完我講，會入場支持港甲。」
後記：森巴贏主場
53歲的積sir與3字頭的丹尼爾，兩代講波佬都睇好巴西可憑主場之利捧走今屆世盃，丹尼爾說：「光是現場球迷唱國歌打氣，已可令巴西隊踢高一線波，冇得輸！」
識睇 一定睇蘋果嘅足動世盃：
http://worldcup2014.appledaily.com/
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp