皇后碼頭拆咗七年都未重建，組件𠵱家仲放喺大嶼山鋪塵，但好快會喺尖沙嘴重現！事關7月7日開幕嘅「香港3D奇幻世界」，將以大熱嘅3D錯視藝術重現皇后。展館位於尖東希爾頓廣場，有成萬呎，館內有70件錯視畫，八大展區主題包羅古今中外上天下海，一個鐘滿足晒所有願望。
80後嘅營運總監羅文慶話，錯視藝術館概念源自韓國，好多港人都玩過，佢今次邀請咗同一班底人馬製作，成個project籌備咗半年咋。展館最大特色係將香港人氣景點結合超現實元素，例如大家可以化身蜘蛛俠踩上中銀大廈樓頂，又或者喺中環中心搶包山，甚至乘着飛龍遊維港，比去實景更多fun。
除咗錯視畫，展館仲有立體裝置讓你恍如置身漫天星光中，又有鏡子迷宮等。展品耐唔耐會更新，大時大節仲有主題式展品應節。展館全年無休、朝10晚10開放。
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp