世界盃足球賽，快將開幕，各地球迷已磨拳擦掌儲定精神和銀紙，以備睇波賭波之用。
據報，上屆2010年南非世界盃的各式各樣非法賭波投注總額有一萬億港元之巨，單是香港警察破獲嘅地下波纜就有三億六千萬港元，至於總額大成點，可說係任你估。既然球迷銀紙好似易搵，必定有外圍賭波集團拎出十幾億，以至三四十億嚟賄賂一切有辦法影響一場球賽勝負嘅人士啦，舉個虛假例子，譬如巴西對中國，係球迷都買巴西贏波，如果非法集團可以搞到中國贏嘅話，係唔係會賺到笑呢。
大西洋兩岸嘅著名報紙，兩張「時報」，即「紐約時報」與「倫敦時報」（泰晤士報）不約而同，在世界足球大戰一觸即發時刻，分別派卧底記者搵料，「紐時」踢爆國際足協FIFA嘅內部調查報告，清楚披露賭波網絡之龐大，無遠弗屆，在星加坡有操控基地，一場無人重視嘅國際賽──南非對危地馬拉，執法球證都可以在賽前大嗱嗱袋住十萬美元現鈔走入銀行存款。而「泰晤士報」就揭發卡塔爾透過前亞洲足協主席夏文（卡塔爾人）行賄各地投票委員，賄款高達五百萬美元，投票選出卡塔爾為2022年世界盃主辦國。呢啲賭波行賄醜聞，屢有所聞，資深球迷應該見怪不怪，不過令人驚異嘅係，賭波集團以及政治掛帥嘅集團，竟擁有咁多銀彈去影響賽事，而且專門向貧窮國家官員及球證埋手，手法可以去到咁盡。
香港嘅唯一合法賭波途徑係在馬會投注站或電話戶口投注，左丁山當然知道有賭波行賄呢回事，故此下注會揀場合，第一：世界盃分組賽少賭；第二：涉及非洲及南美國家賽事盡量不賭，巴西、阿根廷除外；第三：要在十六強打淘汰賽之時，先至加多啲注碼。原因幾簡單，非洲及南美小國，國情行情難以猜測，分組賽對一啲出線希望不大嘅國家可有可無，但出咗線入到十六強之後，球員身價與國家榮譽感加晒分嘞，球員落力程度零舍唔同，去到八強，四強及決賽，更會打甩髀，大打真軍，估計今屆冠軍不離巴西、阿根廷、德國、西班牙是但一隊，榮譽所在，佢地一定表現真功夫嘅。
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp