先旨聲明，以下故事全部屬實，絕無影射。
十四世紀，英、法兩國大戰，前後打足一百年，當法蘭西北部地區包括巴黎，幾乎被諸侯公爵瓜分，大家飲慣的紅酒產地勃艮第有個公爵，更公然唔妥皇室，勾結外國勢力，令國家陷入內戰，後來英國佬更乘虛而入分一杯羮，搞成四分五裂局面，真正屬於法蘭西「百合花王朝」的土地，在版圖上只剩下三分一，令亂局雪上加霜則是法國皇太后伊莎貝拉將女兒許配英皇亨利五世，還簽訂條約，將法國皇室繼承權拱手相讓予英皇，公然賣國，而因為通往在傳統上為法國皇室加冕的蘭斯地區的道路，正被英軍佔領，故此皇儲查理七世一直未能登基，而意志消沉。
雖然英、法兩國文化背景各有異同，但語言文字雞同鴨講，英國佬以「宗主國」身份予取予攜，不但越界搶掠法民物資，更企圖逐步進行文化入侵，消滅一個民族，先消滅其語言文化，古已有之，正路到極。
正當法蘭西亡國在即，位於洛林地區出個鄉下妹叫貞德，自稱受到「感召」，要執行兩大任務：一、趕英國佬返歸，二、解放被英軍圍困的奧里昂，打開往蘭斯的通道，扶助太子登基。任重道遠，但弊在鄉下妹年方十八，盲字唔識多個，更遑論舞刀弄劍帶兵上戰場，要人信佢有此能力，更甚於要人信六四從來冇死過人。
呢個世界可以話有鬼揞眼，可以話冤豬頭遇齆鼻菩薩，全世界當佢儍，偏偏最高領導死馬當活馬醫，孤注一擲往鄉下妹身上，官員上下無不O嘴，但老闆說了算，下面只有學保皇黨盲撐到底，大家心諗：「呢鋪睇吓點死。」
但後來歷史證明，貞德講得出做得到，而且連連收復失地，令唔服之人繼續O嘴，當然，「宗主國」英國佬利益受損，元氣大傷，惟有向當時甚至凌駕政治的宗教界輸送利益，將明明是「民族英雌」的貞德貶為女巫異端，送上宗教法庭在法國受審，更可悲的是，被貞德全力扶助登基的查理七世竟拒絕施救，最後貞德慘被押上火刑台。
25年後獲平反
一個忘恩負義的人，但良知若未泯滅，無間斷的自疚足以令心靈重回正軌，就在貞德死後25年，查理七世排除萬難，以法皇身份為貞德立案重審，最後還她清白。橋段超越包青天申冤，直逼槍手就係大導個小三個老竇一樣咁玄，所以奉勸以後聽古唔准駁古。
貞德的名聲等了25年就得到平反，但同樣的四分一世紀，對於某些歷史慘案來說卻是遙不可及。
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp