孫敬安同老婆盧敏儀噚日喺觀塘舉行咗嗰記者會，現場仲有兩位律師，為乜事咁大陣仗呢？原來為咗韓國塑身天后鄭多燕，上個月喺《鄭多燕萬人熱辣show》開騷期間，炮轟主辦單位安排貨不對辦，孫敬安前日正式入稟高等法院，告鄭多燕誹謗。孫敬安話：「本來諗住唔告，但有街坊甚至唔識嘅人話戥我哋唔抵，俾人數臭，所以交畀法律還清白。」
盧敏儀封老公嘴
其中一位律師話有兩個方法交收告票，一係鄭多燕搵香港律師喺呢邊收，一係就孫敬安佢哋搵韓國律師畀佢哋喎！另一位律師補充申訴書有三點，一係要求鄭多燕道歉，二係禁制誹謗言論，三係金錢索償。
問盧敏儀之前同蔡楓華（Ken）搞演唱會，今次同鄭多燕合作都係不快收場，有冇陰影？佢就解釋：「同Ken嗰次冇不快，我哋純粹想幫佢，兩件事拉埋嚟講對我哋唔公道。我諗番可能我都有唔啱，想將Ken改變為一個我認為更完美嘅人。」呢個時候孫敬安爆咗句：「好似你逼佢睇精神科醫生……」話都未講完，盧敏儀就示意佢唔好再講，然後仲話：「我冇逼佢，唔關精神科事，我老公亂噏！」
案件編號：HCA977/2014
撰文：馮仁昭
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp