車路士收購迪亞高哥斯達嘅傳聞已經講咗好耐，最新消息傳出，車路士將以3,200萬鎊（約4.1億港元）成功簽入哥斯達，據聞佢嘅周薪係15萬鎊。啱啱傷癒嘅哥斯達仲已經喺周三通過體測，會方應該好快會宣佈佢正式加盟。食髓知味，據講車仔會食住個勢繼續增兵換血，文迪蘇傑同法比加斯都有機會跟住上車。
生銹前鋒冇得留低
雖然哥斯達即將成為車仔今夏首簽，但係摩連奴仍然會繼續收購前鋒。摩帥嘅第2個目標，就係拜仁慕尼黑嘅文迪蘇傑。由於今季嘅德甲神射手羅拔利雲度夫斯基即將加盟拜仁，令射手榜排第2嘅文仔喺拜仁嘅位置好有機會被取代，加上哥迪奧拿鍾意玩無鋒陣，所以文仔離隊機會好大，車路士如果想簽呢位克羅地亞射手，成功機會都唔細。
碧基爆法比仔出「塞」
兩位狀態大勇嘅國腳級人馬大有機會加盟，陣中幾位今季貢獻欠奉嘅前鋒睇怕都未必有得留低。其中伊度奧早已肯定離隊，丹巴巴亞亦傳會轉投土超球會比錫達斯；至於費蘭度托利斯，似乎留隊機會最大，但係下季嘅上陣機會就應該唔多喇。最慘都係今季被外借去愛華頓嘅盧卡古，呢位「小魔獸」近季外借表現都好好，就算去到國家隊都入球唔少，但係喺車路士就苦無機會，或者可能自己嗌走人都唔出奇。
除咗以上兩位前鋒外，車路士最近都傳過唔少收購目標。當中包括法比加斯、同埋哥斯達喺馬體會嘅兩位隊友，堤亞高文迪斯以及菲臘路爾斯。當林柏特宣佈下季離隊後，車路士就成為法比仔下任東家嘅大熱，佢嘅球會兼國家隊隊友碧基仲俾人偷聽到佢同迪保斯基講，法比仔親自話佢知，將會以3,300萬歐元（約3.4億港元）離開巴塞，但就冇講會去邊；而艾殊利高爾離隊後，車仔亦需要買番個左閘替補，所以睇中咗今季喺馬體會表現出色嘅菲臘路爾斯，仲想打包埋曾經喺摩佬麾下踢過車仔嘅堤亞高回巢㖭。
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp