原籍馬來西亞的Mandy Lieu 18歲時來港闖蕩模界，正值混血model盛世，Mandy成功上位。如今主持、拍戲、投資做老闆瓣瓣掂。美貌成就事業，同時惹來無數桃花，除了與陳柏霖的一段陳年情史，傳過緋聞的還有李澤楷、金剛、林德信，電力十足。29歲的她，靚女有人追天經地義，Mandy卻更享受單身一個，反正從來沒有把結婚生仔列入人生清單，期待三字頭、四字頭更charm的Mandy Lieu。
撰文及造型：鄧卓嶽
攝影：郭賢興
化妝：AnnaEden
髮型：Adrian Au of HIP hair culture
不愛規劃每一步，做事隨心講timing，如網上流傳一個自己從未起過的中文名叫劉碧麗，見是網民一番好意，Mandy便照單全收；又譬如當初來港一心貪玩，沒想到十年後的她會在此落地生根。
學懂愛自己
剛過了29歲生日，人生邁向30大關，自言條件好未驚過，「三十歲好似一個新開始，如果你問我，我鍾意今日嘅我多過18歲嘅我。今日嘅我多咗好多經歷、智慧，更多咗膽量，敢去愛去做。」歲月放膽過來，Mandy更期待下一個十年，「我好想去認識40歲嘅我，到時呢個女人一定會好有魅力、好有趣。」
自信爆棚，對於單身亦不以為意，「目前單身，但係係一個好開心嘅階段。」難道身邊都沒有追求者嗎？「我話冇就呃你喇。慢慢嚟，我都唔急。每個人要嘅嘢都唔同，我有朋友好細個就好清晰，畢業後搵個好老公結婚生仔，但係呢個從來唔係我嘅人生目標。」結婚生仔不是目標，不過愛情始終不可或缺，「我好注重愛，人係要有情去生存，無論係友情、親情、愛情，就算自己一個都要識得愛自己，唔可以將個宇宙中心擺喺人哋身上，我都花咗好多年時間，先學識enjoy同自己相處。我好幸運每日每秒身邊有好多人畀到我好多愛。」
拍戲拍上癮
名模轉型女強人成了大趨勢，Amanda S學整餅、Cara G.開果汁店，有副業傍身最實際，至於Mandy卻只想專注娛樂圈的工作，「一定要做自己passionate嘅嘢，目前每一日起身我都係做緊我好鍾意嘅嘢，咁就好足夠。」百足般多線發展，Mandy覺得自己不算轉型，每項新工作其實只是自己的一種延伸，投資娛樂公司升呢做老闆，Mandy每日都在學習之中，「所有我做嘅嘢都係我嘅一部份，part of Mandy。從來冇諗過幾時要由model轉型做主持，轉去拍戲，或者特登開公司。有時有啲機會嚟到，要好好珍惜囉，都要講timing。」
作為影壇新人，Mandy今年一口氣有三部戲上畫，《盜馬記》放笑彈、《痞子英雄 2》做打女，還有活色生香的《愛．尋．迷》，大膽裸戲實屬小菜一碟，「我覺得冇問題，as long as係合理，又唔係特登話要拍三級片為露而露。」拍戲拍上癮，機會接踵而至，7月將接新戲，早前又前往雲南拍微電影。拍得辛苦但過程好開心，「去到好偏僻嘅地方拍攝，個故事好感人，帶出嘅message好好，係想叫人對unknown嘅嘢唔需要驚。」對未知的未來Mandy同樣不懼怕，反而滿心期待。
靈修中放下
Mandy自小學習芭蕾舞，筋骨夠軟，練得一副美好身材，長大後又鑽研瑜伽，務求身與心同channel，之前亦試過去印度靈修，「健康除咗外在，內在都好重要。去印度兩個禮拜，除咗冥想同瑜伽之外，乜都唔做，食得好清又唔使同人social。」脫離都市煩囂，第一件事原來是要學懂放下。「最困難係要熄電話，成日覺得公司會打嚟，每次做完meditation(冥想)行返入房，就想搵個電話覆message。」與世隔絕的旅程，獲益良多，「有時間停低好好思考，你會搵到好多嘢inspire到自己。好多事變得更清楚，之前諗唔通或者睇得太重嘅嘢，換個角度睇就冇事。」
更多精采時尚內容，盡在 http://add.appledaily.com。
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp