彭順偷嗒𡃁模,竟捲入槍殺案,由C1殺到入A1。咁離奇嘅劇情,相信神級編劇都諗唔到。呢幾日,好多人會話彭順執番身彩,但大家食花生嘅同時,最慘嘅一定係李心潔。坊間有句金句,「人妻最怕撞三件事,撞車、撞鬼、撞小三。」雖然話另一半偷食防不勝防,觀乎李心潔咁靚,彭順都要偷食。不過掉轉諗,如果女人太hea,想箍實對方就難上加難。
之前必瘦站(1830)CEO都話公司近一半客喺主婦,除咗湊仔,其餘時間就用嚟扮靚。加上而家啲女人咁忌「中女」呢個稱呼,30幾歲呢個「富貴女性」扮靚市場真係長做長有。公司早兩日公佈,向惠理配股籌1.1億元,佔擴大後已發行股本5.1%,資金用於新增設醫學美容部。目前韓風吹得咁行,而曉明Baby、劉愷威楊冪呢兩對神仙美眷,就算外表無限升級,仍密密有Job,證明市場受落,由此可見,醫學美容會漸成趨勢。必瘦站股價走勢強,各位務必密切留意破唔破到2.28元阻力,一破可衝。不過除咗女人市場外,男人美容市場都唔可以忽視。據Euromonitor數據,2013年全球男性護膚品市場為33億美元,當中亞太區佔65%;至於亞洲男士對美白面霜最有興趣。彭順呢期心情咁差,應該長期面燶燶,或者可以考慮吓做吓美白,再順手剃埋鬚,以後行出街都冇人認到。
Fifi
http://www.facebook.com/lovefrystock
本欄逢周二、四刊出
【壹錘定音】星期一至五,早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp