今屆世界盃有幾多新星湧現，暫時好難講，不過好多球評家都認為比利時中場夏薩特有望上位，「歐洲紅魔鬼」已經安排佢着10號，連車路士亦都落實，下季將10號球衣交埋畀佢；不過另一邊廂巴黎聖日耳門（PSG）就出到1億鎊（約12.9億港元）總代價收購佢，一邊有情義，一邊有金錢，23歲嘅夏薩特又點揀呢？
PSG願花1億鎊收購
桑馬達喺上季中轉投曼聯之後，車仔嘅10號仔就懸空，講資格，夏薩特就最值得頂上，車仔亦都好識做，公佈由佢着10號。原本着開17號嘅夏薩特仲好開心咁講：「我最鍾意呢個號碼，加盟車仔前都係着10號，呢個號碼有崇高傳統，好似我唔少偶像都係着10號，包括法國球王施丹。」
英超球員改號碼都好常見，朗尼就先後着過8號同10號；不過車仔官方商店已經出售緊14/15球季波衫，如果有球迷已經印咗夏薩特17號球衣，球隊會免費幫球迷轉番新號碼；唔知香港舖頭會唔會效法吓。
不過，夏薩特下季會唔會以車路士10號仔姿態出戰，到𠵱家仲未有定案，據報法甲冠軍PSG準備開出銀彈，繼收購大衛雷斯後，再向車仔挖角。PSG願意向車仔付出6,100萬鎊轉會費，如夏薩特加盟，就可獲高達15萬鎊周薪嘅5年合約，呢度又要使3,600萬鎊，即係要帶夏薩特返法國，PSG要使差唔多1億鎊。
講真，之前車仔領隊摩連奴賣走同放走唔少主力，好似大衛雷斯、林柏特、A高等，夏薩特都有抱怨過，今次面對PSG銀彈戰術，加上自己又喺法甲成名，拎過兩次法甲最佳球員，都有啲感情，睇嚟夏薩特轉會，隨時由世界盃開波到完結都仲傳緊。
摩佬怕死貼英軍出線
講開車路士，自不然會諗起領隊摩連奴，最近佢就幫網站提供世界盃16強心水，佢估巴西、西班牙、阿根廷等都可以順利出線，一啲都唔意外，不過死亡D組，寸王就估意大利同英格蘭，可以壓過烏拉圭出線，摩連奴仲講笑咁話，如果佢唔估英格蘭出線，下季就唔可以返英超教波。
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp