煤氣（003）近幾年都維持每十股送一紅股嘅優良傳統，小股東自然好happy咁去股東會支持主席李兆基（四叔）啦！今年煤氣股東會繼續喺灣仔會展舉行，接近1,600名小股東捧場，比上年1,200人多咗足足四百人，場面非常墟冚。
股東會喺中午12點開始，有小股東提早一粒鐘到場，不過佢哋咁做都啱，事關公司今年訂唔到大hall，所以部份唔能夠早到嘅小股東只可以坐喺另一間房睇直播，無緣見四叔本人一面。
為回饋小股東，公司安排咗點心拼盤畀小股東拎走，除咗有蝦餃、燒賣呢類基本點心，仲有燕窩蛋撻、鮑魚海鮮酥，中間一個香蘭馬豆糕仲加埋印有煤氣logo嘅朱古力片。咁識做，難怪現場有小股東拍手多謝四叔派紅股啦。
【壹錘定音】星期一至五，早上8點開咪！
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp