狼班子同民建聯打龍通，應該唔係新聞，但有時寧俾人知、莫俾人見。社民連長毛噚日「執」到份民建聯文件，踢爆保安局向民建聯通水，就立法會嘅事務提供跟進問題建議，擺明裏應外合，希望民建聯問啲局方想答嘅嘢。當場斷正嘅保安局局長黎棟國，唔敢直接回應係咪有串通囉！
梁志祥鬧長毛「偷嘢」
立法會保安事務委員會噚日開會討論酷刑聲請嘅審核機制。長毛發言時突然話「執」到一份民建聯研究部嘅文件，上面寫有「保安局提供的跟進提問」，題目包括「為何聲請人一般來港14個月才提出申請？為何容許他們有28日遞表時間？建議7至14日就差不多」，佢即時向與會嘅保安局副局長李家超質問：「點解你提供跟進問題畀政黨？點解唔提供畀我？等我慳番個助理嘛。」
聽到長毛大踢爆後，李家超冇嘢好講；及後再有其他泛民議員追問，同樣與會嘅局長黎棟國先開腔回應，話任何議員若對佢哋嘅文件有問題、要求提供多啲資料，佢哋都會畀意見，至於政團點處理啲意見就自己拿揑喇，始終冇直接回應係咪有通水畀民建聯。事實上民建聯葛珮帆會上嘅提問，都同文件題目好相似。
踢爆一單猛料嘅長毛，就俾民建聯鬧佢「偷嘢」，話長毛係喺梁志祥開會坐嘅位上攞咗呢份文件。梁志祥憤言，有同事隨意攞走佢個位嘅嘢，係唔要得嘅行為，佢聲稱一直有同保安局來往，就唔同問題徵詢意見作內部參考，堅持保安局唔係直接畀問題佢哋，唔應該曲解成保安局畀料佢哋喎。
身為委員會主席兼民建聯黨團召集人嘅葉國謙仲嬲過梁志祥，會上大鬧喺人哋個位攞人哋文件係好唔道德嘅行為，「執嘢都唔係咁執法」。由於收到梁志祥投訴，佢話一定認真跟進。跟進啲乜呢？
李八方
mailto:[email protected]
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp