人總希望預知未來，求神問卜之外，仲想「懶」科學。上周物理學家霍金公佈研究了個多月的結果，以科學分析出英格蘭於世盃的奪冠機會、甚麼情況英軍贏波機會較大、射12碼秘技等，結果最「驚人」之處，係其實你同我都估到！
例如英格蘭在溫和氣候表現好過天熱，鬼唔知咩？主辦國如離英國較遠，環境、文化不同與時差適應，會減少英軍贏波機會，好正路啫！研究是依賴英軍自1966年後45場決賽周比賽的數據，綜合所有氣候、開賽時間、球場海拔等因素，得出分組賽英軍對哥斯達黎加最易打，首戰對意大利最難踢，呢個結論真係要研究成個月？仲有12碼玄機，助跑起碼要3步以上……呢樣嘢阿叔廿年前都講過啦！最後分析預計奪冠熱門係巴西，辛苦晒！
當然，若結果與common sense相差太遠，可能令人覺得仲荒謬；加上博彩公司出資的研究費用，霍金也是拿來做善事，無所謂啦。比較有新意的發現是守12碼時，若赫特學似傳奇門將高巴拿咁左跳右跳，對方射失機會將上升18%，呢樣又博得過！唔知赫特使唔使排番隻「底線舞」？
講到預測，當年格拉沙入主曼聯令球會債台高築，不少人預測高負債將拖垮球會，球迷嬲到咒佢死。結果？上周格拉沙以85歲高齡逝世，而曼聯自他入主後贏了5屆英超1屆歐聯。你敢說沒有他的曼聯會更成功嗎？
方柏翹
now足球評述員
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp