【本報訊】按捺多年，82歲的天主教香港教區榮休主教陳日君樞機，今晚將首次參與六四集會，和巿民一起亮起良知的燭芯。屠城至今25年，英雄被稱為暴民、倖存者痛苦偷生、民主夢越走越遠，陳日君勸勉失落的港人不要放棄希望、不要就此投降，不要只計較眼前效果，強調只有繼續堅持，民主才會有天開花結果，「我哋一定要企直，我哋唔可以自己跪低」。
記者：張嘉雯 朱雋穎 姚國雄 林社炳 周文傑 植敏欣
陳日君每年支持天主教團體支援中國愛國民主運動聯合會（天支聯）舉行的六四悼念活動，上周主持其中一次六四彌撒時，直言「心急」看到平反一天，為了已犧牲的人，他不會放棄、不會投降，亦不會甘心做奴隸。他在接受《蘋果》訪問時更表明將首次出席燭光集會，「如果今年唔去，明年可能已經癡呆㗎喇，82歲㗎喇，唔等得㗎喇」。
稱六四英雄為殉道者
他希望靜靜與巿民一起悼念，當晚不會上台，亦不會發言，對於近年有聲音指悼念活動沒有效果，他在講道中回應，「有啲人問，仲嚟呢度做乜喎？因為我哋唔可以忘記嗰啲喺天安門廣場上同埋周圍為我哋犧牲自己嘅英雄，我哋甚至應該稱佢哋係殉道者；我哋唔可以忍受人哋仲繼續將佢哋稱做暴民，佢哋係愛國英雄；我哋唔可以忍受當時同伴仲喺度受害，要繼續默默忍受，佢哋嘅英雄行為被當成罪行；我哋都唔可能忍受佢哋嘅親戚唔可以去紀念佢哋犧牲；我哋唔可以忍受嗰時嘅理想，離我哋越來越遠」。
為下一代講良心說話
他坦言，六四至今未平反，他作為「凡人」非常心急，「10年前（2003年），我去完祈禱會，有人問我，『明年你嚟唔嚟呀？』，我話『明年嚟，慶祝平反』，點知過咗10年喇，都仲未平反」。他提醒信徒，正正因為平反日子未到，更要繼續宣揚六四精神，「為佢哋堅持，令佢哋得到公道，為我哋堅持，因為我哋越嚟越睇到我哋嘅自由、我哋嘅一國兩制，已經唔能夠當成理所當然」。
他解釋，不能等內地先有自由，香港才得享自由，「無真正嘅自由，都唔會有宗教自由，我哋要爭取公民自由，為自己、為我哋下一代，大家一齊講良心說話」。
對強權容忍就是懦弱
陳日君指，在六四中犧牲的人是大家的榜樣，他們的勇氣「令好多中國人醒番」，「有啲人話25年囉，仲追求啲乜嘢？冇乜希望啦，不如試吓第二啲方法啦，溫和啲，容忍吓囉，但我哋已經睇到容忍嘅後果係乜嘢，為嗰啲強權嘅人，容忍就係懦弱，我哋一定要企直，我哋唔可以自己跪低」。
陳日君又指近年北京不斷打壓，令人民更加不能溫和，「上面好強壓落嚟，叫我哋點溫和呢？叫我哋點容忍呢？」
他以榮休教宗對中國教會的勸勉，提醒教徒參與行動時不要只計較眼前的效果，「本篤向中國教會話，『你哋要堅持到底，就算眼前睇嚟完全失敗。』我哋失敗咗25年，但仲要堅持落去，放棄就等於冇希望，我哋唔放棄就有希望，我哋要繼續以和平方式，好強咁抗議」。
【六四25周年專頁】燭光不滅，血仍未冷，民主中華，花果漂零。蘋果請你一同見證：良知，從未貶值！ http://64.appledaily.com
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp