本欄5月2號主打內房香港建設（190），啱上周四最高見0.255元，升20%，跑贏同期場內龍頭龍尾內房股。整多件平靚正中渝置地（1224），集團食正阿爺重點一億落戶中西部城鎮化國策，有剛性需求撐住，嚟緊日子，好掂。
中渝主打祖國中西部房產，正正係總理李克強點名三個一億人口當中，一億人落戶地區。而應佔建築面積土儲，上億平方呎，組合既有高檔次，又有大眾化項目。
中渝食正城鎮化同中西部開發重點國策，土儲size大，組合夠廣，貨如輪轉。
財政狀況夠健康
事實亦係咁，中渝到上年底，已預售未入賬額，高達174億港銀，係上年度收入68.4億銀嘅2.5倍！又中渝今年頭四個月，累計銷售額，雖則話跌咗27%，但上年同期基數大，係一個問題，而且，今年頭四個月銷售額27億銀，亦唔係細數目。
再講，中渝今年頭完成出售重慶照母山項目，高達4.6億銀嘅稅前溢利，應該可以喺嚟緊上半年張成績單反映，仲有得炒佢盈喜。再睇中渝財政，上年底手頭現金高達96.4億銀，銀貸111億銀，淨銀貸14.5億銀，淨銀貸比率得9.2%。呢個借貸比率唔似部份內房，水浸眼眉，兼健康到痹！
中渝查實好掂檔，但現價（1.52元）就貼住五年低位，就算未計上邊預售收入嘅增值，家陣PB得0.27倍，PE得7.8倍，殘到爆！
若果有留意，場內淡友就連港建咁細奀嘅內房，都唔放過沽空。所以，限購令呢個淡友金鐘罩一取消，補空倉盤肯定刺激內房股價，火上加油。買中渝，當翻半番到2.3元，PB都係講緊得0.4倍，仲係殘得好陰公。
錢雋
細價股專家
本欄逢周二、三、五刊出
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp