「1600熊貓遊香港˙創意×保育」6月9日會展開香港巡迴展，但噚日竟然預先曝光！噚日有網民影到一隊熊貓大軍殺入香港國際機場，佢哋浩浩蕩蕩落機，場面震撼。仔細睇，熊貓係坐國泰航班「香港精神號」抵港，好可愛呀！
俾網民率先曝光，展覽負責人SK就講笑，「1,600隻一架機坐唔晒㗎，所以咪要分開幾架機囉，6月9日就全部都會嚟晒」。佢哋之後會快閃去天壇大佛、維園、文化中心等，最後喺中環元創方展出。
而內地就再有涉抄襲嘅熊貓展。今次竟然發生喺香港嘉里建設有份嘅上海靜安嘉里中心，靜安嘉里嘅微博介紹呢個疑似翻版展覽，但可惜正版有1,600隻、佢哋只有100隻展出。網民話呢個「1St panda」熊貓展之後仲會喺內地其餘32個城市巡迴展出㖭。世界自然基金會香港分會（WWF）發聲明，話佢哋同法國藝術家Paulo Grangeon共同擁有「1600熊貓遊香港˙創意×保育」巡迴展版權，任何未經授權展覽，保留追究其法律責任權利；香港嘉里截稿前都冇回應。
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp