NBA總決賽美國時間周四展開，熱火力爭3連冠，加上上屆已經力克馬刺，理論上睇高一線，不過或者美國人鋤強扶弱，又可能係熱火贏得太多乞人憎，美國《ESPN》搞嘅網上投票，全國50州當中，竟然有49個州分支持馬刺，撐熱火只係得番大本營佛羅里達州。
美國之前選總統都好鍾意搞呢啲州分投票意向，𠵱家推廣到NBA總冠軍都有得玩，《ESPN》搞呢個網上票選，去到周二下午已經有超過15萬人投票，當中有57%嘅網民支持馬刺拎總冠軍，仲有49個州份超過5成球迷撐馬刺，令到代表馬刺嘅紅色遍佈全國。相反熱火只得28%選票，上屆佢哋都贏到6個州，包括南卡州、密西西比州等東南部州分，可惜今屆連呢啲州都輸埋，只保得住一個佛羅里達州咁大把。
大帝無懼總決賽改制
不過籃球比賽唔同選總統，多人支持未必代表贏，熱火前鋒勒邦占士對於唔被睇好就處之泰然，大帝話：「我唔知外界點睇，我亦都唔關心，我只知會盡力贏取餘下比賽。」NBA今季開始將總決賽賽制，改番1984年舊制，即係2-2-1-1-1，熱火後衞獲迪就話：「我唔知改制嘅影響，就算馬刺前鋒鄧肯，都未試過呢個賽制。」
常規賽拎第1位，馬刺擁有多1場主場之利，首兩戰亦喺聖安東尼奧出戰，鄧肯就好有信心成功報仇：「好高興再對熱火，我自信冠軍會係馬刺。」
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp