「一世人未入過廚房」嘅香港首富李嘉誠，先前「破戒」落廚炒植物蛋，力sell維港投資（Horizons Ventures）有份注資嘅植物蛋公司Hampton Creek，身在美國嘅創辦人Josh Tetrick噚日下晝，用視像通話同傳媒打招呼，話研究緊用植物蛋整「薩琪瑪」、「蛋撻」呢類小食，下年攻打內地市場喎。
為咗融入香港，Josh仲專登拍咗條短片，用廣東話講咗幾次「好味」。講到王牌產品植物蛋黃醬Just Mayo，就話會喺下周五正式開售，話呢款李氏出品，暫時只有百佳嘅Great Food Hall金鐘分店有得賣，比原先估計遲咗兩個星期。
維港投資今次仲幫Hampton Creek搞咗試食會，吸引咗成百人嚟試下呢幾款植物蛋，搵埋才子陶傑、音樂人黎小田、專欄作家項明生嚟撐場，個個都賣口乖話遲啲會買返幾支擺屋企。呢款蛋黃醬八安士（237mL）售價係19.5元，一共有四款味道。
【壹錘定音】6月4日早上8點開咪!
http://hk.apple.nextmedia.com/livestream/channel/lishow
立即更新Android《蘋果動新聞》app
https://bitly.com/appledailyandroidapp